Ózindik qaýipsizdik departamentiniń bastyǵy taǵaıyndaldy

ASTANA. KAZINFORM —  Іshki ister mınıstri Erjan Sadenovtyń buıryǵymen polıtsııa polkovnıgi Talǵat Shaıahmetov Іshki ister mınıstrliginiń Ózindik qaýipsizdik departamentiniń bastyǵy bolyp taǵaıyndaldy.  Bul týraly ІІM baspasóz qyzmeti habarlady. 

Polıtsııa polkovnıgi Shaıahmetov ishki ister organdarynda 27 jyldan astam qyzmet atqaryp keledi. Ol krımınaldyq polıtsııa, uıymdasqan qylmysqa qarsy kúres jáne ózindik qaýipsizdik boıynsha bólinisterde úlken tájirıbe jınaqtaǵan. 

Ár jyldary túrli basshylyq laýazymdarda, sonyń ishinde ІІM ÓQD bastyǵynyń orynbasary, aýmaqtyq polıtsııa departamenti bastyǵynyń orynbasary qyzmetterin atqardy.

Jańa taǵaıyndaýǵa deıin ІІM Krımınaldyq polıtsııa departamenti bastyǵynyń orynbasary bolǵan.

Jańa basshyny jeke quramǵa tanystyrý barysynda Іshki ister mınıstri Erjan Sádenov qyzmettik tártipti qamtamasyz etý men quqyqbuzýshylyqtardyń aldyn alý boıynsha júıeli tásilderdi qaıta qaraýdyń mańyzdylyǵyn atap ótti.

Mınıstr profılaktıkalyq jumysty kúsheıtýdi, ofıtserler quramynyń áleýetin adaldyq pen ujymdyq jaýapkershilik quraly retinde belsendi paıdalanýdy tapsyrdy. Ol sondaı-aq antqa adal emes qyzmetkerlerden der kezinde arylý qajettigin, «aýyr saldarǵa jetkizbeı» máseleni sheshý kerektigin erekshe atap ótti. 

— Polıtseı men quqyqbuzýshylyq — úılespeıtin uǵymdar. Biz buǵan eshqandaı jaǵdaıda tózimdilik tanyta almaımyz, — dedi Erjan Sádenov.

Mınıstr sonymen qatar rezonanstyq oqıǵalarǵa jol berilgen jaǵdaıda jeke jaýapkershilik tek tikeleı basshylarda ǵana emes, sondaı-aq ózindik qaýipsizdik bólinisterinde de bolatynyn eske saldy.

— Biz bárimiz — siz de, men de — qyzmettiń ótkeni, búgini jáne bolashaǵy úshin jaýaptymyz. Barlyq mindet adaldyq, ádildik jáne ar-namyspen ymyrasyz oryndalýy tıis, — dep atap ótti mınıstr.

Aıta ketelik Astanada Memlekettik kirister departamentine jańa basshy taǵaıyndalǵan edi.