Ózin blogermin dep tanystyrǵan aqtóbelik sottaldy

AQTÓBE. KAZINFORM — Jumysqa ornalastyramyn, alkogol satýǵa ruqsat alyp beremin jáne qujattardy retteýge kómektemesin dep senimge kirgen. Blogerge 3 jylǵa bas bostandyǵynan shekteý jazasy taǵaıyndaldy.

Muǵaljar aýdandyq sotynda Qylmystyq kodekstiń 190-baby 3-bóliginiń 4-tarmaǵy, ıaǵnı alaıaqtyq babymen aıyptalǵan blogerdiń isi qaraldy. Іs materıalyna súıensek, sottalýshy 2023 jyldyń tamyz aıynda Qandyaǵash qalasynda ornalasqan azyq-túlik dúkeniniń ıesimen tanysyp, óziniń qoǵam belsendisi ekenin aıtady. Sóıtip saǵat 23:00–den keıin de alkogol ónimderin satýǵa ruqsat alyp beretinin aıtyp, qyzmeti úshin 1 mln teńge alǵan. Sonymen birge kólik jýý qyzmetiniń ıesine júrgizýshi kýáligin qalpyna keltirý qyzmetin usynyp, 257 000 teńge surady. Taǵy bir adamdy jumysqa ornalastyratyn aıtyp, 450 000 teńge aldy. 

— Qandyaǵash qalasynda ornalasqan saıabaq pen skverdi kútip ustaý jumysy boıynsha ashyq konkýrs jeńimpaz dep tanylǵan N.-niń konkýrstyq qujatamasy biliktilik talaptarǵa saı kelmegen. Soǵan qaramastan «bárin rettep beremin» dep ýáde berip, 1 000 000 teńge ıemdengen. Sot otyrysynda sottalýshy kinásin moıyndady. Sot úkimmen sottalýshy kináli dep tanylyp, oǵan 3 jyl merzimge bas bostandyǵynan shekteý jazasy taǵaıyndaldy. Jábirlenýshilerge keltirilgen materıaldyq zalal tolyǵymen óteldi. Úkim zańdy kúshine engen joq, — dep habarlady Aqtóbe oblystyq sotynyń baspasóz qyzmeti.

Eske salsaq, sottalýshy bıyl naýryz aıynda ǵana qoǵamdyq keńeske múshe bolǵan.