Ózim de Pfizer vaktsınasyn saldyrar edim – Jandarbek Bekshın

ALMATY. QazAqparat - Almaty qalasynyń bas memlekettik sanıtarlyq dárigeri Jandarbek Bekshın brıfıng barysynda «12-18 jas aralyǵyndaǵy jaqyndaryńyzǵa Pfizer vaktsınasyn saldyrasyz ba?» degen saýalǵa jaýap berdi, dep habarlaıdy QazAqpara tilshisi.

«Árıne, saldyramyn. Ózim de saldyrar edim. Meniń áriptesterim balalaryn emhanaǵa senbi-jeksenbi kúnderi alyp bardy. Úmitkerlerdiń sany kún saıyn kóbeıip jatyr. Vaktsınany búkil álem paıdalanýda. Dúnıejúzilik densaýlyq saqtaý uıymynyń tekserisinen ótken. Sondyqtan eshqandaı qorqynysh joq. Meniń balalarym ol jastan ótip ketken, nemerelerim áli 12 jasqa tolǵan joq. Úlken nemerem 9 jasta, keıde oǵan da saldyrý kerek dep oılanyp qalamyn. Biraq onyń jasy áli 12-ge tolmady», – dedi Almaty qalasynyń bas sanıtar dárigeri.

Aıta keteıik, Almatylyq jasóspirimderge Pfizer vaktsınasyn salý 12 qarashada bastaldy.

Jandarbek Bekshın ata-analar qalasa, balasyna ekpe jasaǵan kezde qasynda bola alatynyn aıtty.