Ózge ult depýtattary qazaq tilin úırenýge den qoıdy
Mádenı-áleýmettik damý jáne ǵylym komıtetiniń búgingi otyrysynda úkimettik emes uıymdarǵa qatysty zań jobasy qaraldy. Otyrysqa qatysqandardyń barlyǵy derlik oılaryn memlekettik tilde jetkizip, ózara pikir almasyp otyrdy. QR Din isteri jáne azamattyq qoǵam vıtse-mınıstri Abzal Núkenov te óz baıandamasyn tolyǵymen qazaq tilinde jasady.
Al májilistiń sońynda komıtet tóraıymy Birǵanym Áıtimova qosymsha baıandamashy Sergeı Ershovqa qarap: "Qosymsha baıandamashydan bir ǵana usynys tústi. Osy zań jobasyn Parlament Senatynyń otyrysyna shyǵarý qajet. Ony birneshe oqylymda talqylaıtyn bolamyz. Atalǵan qujatty qabyldaımyz degen oıdamyn. Komıtet músheleri tarapynan qarsylyq bolmasa, Sergeı Mıxaılovıch Ershov bizdiń atymyzdan qosymsha baıandashy retinde usynylady. Ózinen de osyny suraımyz. Kelisesiz ǵoı?", - dep surady.
Osy kezde senator Ershov sınxrondy aýdarmasyn alyp tastap: "Da", - dep jaýap berdi. "Kelisemin deseńizshi, qazaqsha", - dedi B.Áıtimova. Áriptesi "Kelisemin!" degennen keıin Birǵanym Áıtimova keıbir depýtattardyń qazaq tilin meńgerýge den qoıǵanyn jetkizdi. "Negizi, Sergeı Mıxaılovıch qazaq tilin oqyp júr. Menimen qazaqsha sóılesińder dep, ózi aıtady. Sol sebepti qazaqsha jaýap bersin dep surap jatyrmyn", - dep atap kórsetti B.Áıtimova.
