Ózbekstannyń Namangan qalasynda 65-shi halyqaralyq gúlder festıvali ashyldy
ASTANA. KAZINFORM — Ózbekstannyń «gúlder qalasy» atanyp ketken Namangan qalasynda 65-shi halyqaralyq gúlder festıvali ótip jatyr. Bul týraly Anadoly agenttigi málim etti.
Tarıhy 1961 jyldan bastaý alatyn mereke 24 mamyrda bastalyp, 2026 jyldyń 12 shildesine deıin jalǵasady.
Eldegi eń mańyzdy mádenı is-sharalardyń biri sanalatyn festıvalge 500-ge jýyq jergilikti jáne sheteldik baǵban, florıst pen dızaıner qatysty. Munda sırek kezdesetin túrlerdi qosa alǵanda, gúlderdiń 1000-nan astam surypy usynylǵan.
Іs-shara aıasynda Namangannyń «gúlder qalasy» retindegi bedelin nyǵaıtý maqsatynda qala boıynsha zamanaýı landshaftyq jáne dızaınerlik sheshimdermen bezendirilgen stendterge, dekoratıvtik buıymdar men mınıatıýralarǵa shamamen 120 túrli gúldiń 150 mıllıon túbi otyrǵyzylmaq.
Dástúrli avtoparad ta josparlanǵan. Onyń aıasynda tiri gúldermen bezendirilgen túrli markaly 200-den astam kólik Namangan halyqaralyq áýejaıynan Babyr saıabaǵyna deıingi 10 shaqyrymnan astam joldy júrip ótedi.
Festıvaldiń basty alańy — Babyr saıabaǵynda shamamen 8 gektar aýmaqta 250-den astam baǵban, florıst jáne dızaıner daıyndaǵan aýqymdy gúl kompozıtsııalary qoıylǵan. Sondaı-aq saıabaq aýmaǵynda kelýshiler úshin 12 arnaıy fotozona jasaqtalǵan.
Bıyl festıval aıasynda shamamen 150 mıllıon gúl kóshetin otyrǵyzý josparlanyp otyr. 2018 jylǵy festıvalde Namanganda 4,5 mıllıon gúl egilse, 2023 jyly — 35 mıllıon, 2024 jyly — 45 mıllıon, al 2025 jyly shamamen 100 mıllıon gúl otyrǵyzylǵan.
Bıyl festıvalge 50-den astam elden 1 mıllıonnan asa sheteldik týrıst jáne shamamen 7 mıllıon jergilikti turǵyn keledi dep kútilýde.
Festıvalge baılanysty qaladaǵy qonaqúılerdiń tolý deńgeıi 95 paıyzǵa jetken.
Gınnestiń rekordtar kitabyna ótinim berildi
Bıylǵy festıval aıasyndaǵy halyqaralyq bastamalardyń biri — Gınnestiń rekordtar kitabyna ótinim berý boldy.
Festıval aldynda, 20 sáýir men 20 mamyr aralyǵynda, rekord ornatý maqsatynda Namanganda shamamen 30 mıllıon gúl otyrǵyzylǵan. Búkil protsess halyqaralyq standarttarǵa saı qujattalyp, qajetti qujattar men derekter Guinness World Records uıymyna joldanǵan.
150-den astam is-shara ótedi
Festıval aıasynda kontsertter, teatrlyq jáne tsırktik qoıylymdar, gala-keshter, sán kórsetilimderi, jármeńkeler men mádenı baǵdarlamalardy qamtıtyn 150-den astam halyqaralyq jáne ulttyq is-shara uıymdastyrylady.
Baǵdarlamada jergilikti jáne sheteldik ártisterdiń, sondaı-aq Ózbekstan ulttyq sımfonııalyq orkestriniń qatysýymen ashyq aspan astyndaǵy kontsert ótedi. Sonymen qatar Fashion Week 2026 aıasynda Túrkııany qosa alǵanda, kóptegen elderdiń dızaınerleri daıyndaǵan gúldi toptamalar usynylady.
Sondaı-aq «Lavanda festıvali», «Aspandaǵy kóktem» taqyrybyndaǵy 500-den astam dron qatysatyn shoý, «Namangandaǵy álem dámderi» gastronomııalyq is-sharasy, Maqom óneri boıynsha III halyqaralyq konferentsııa, halyqaralyq etnosport oıyndary, Azııa áıel kásipkerler forýmy, III halyqaralyq qolónershiler jármeńkesi, Úndi mádenıeti men kınosy kúnderi josparlanǵan.
Festıval barysynda Nıderland, Japonııa jáne Túrkııa mamandarynyń qatysýymen florıstıka boıynsha sheberlik sabaqtary, sondaı-aq balalarǵa arnalǵan gúl otyrǵyzý, ıkebana jáne sýret salý úıirmeleri ótkiziledi.
Festıval 12 shildege deıin jalǵasady. Festıval aýmaǵyndaǵy 8 kireberis qaqpada ózbek, orys, aǵylshyn jáne túrik tilderin meńgergen 60-tan astam erikti qyzmet kórsetedi.
Festıvaldiń jabylý saltanaty Ańyzdar alqaby saıabaǵynda gala-kontsert formatynda ótedi. Onda túrli atalymdar boıynsha jeńimpazdar marapattalady.
Gınnestiń rekordtar kitabyna enýge nıetti
Namangan qalasynyń hokımi Shavkat Abdýrazakov Anadolu agenttigine bergen suhbatynda 65-shi halyqaralyq gúlder festıvaliniń bıylǵy ereksheligi — uıymdastyrýshylardyń Gınnestiń rekordtar kitabyna enýdi maqsat etip otyrǵanynda ekenin aıtty.
Abdýrazakovtyń sózinshe, «Bir aı ishinde komanda otyrǵyzǵan eń kóp gúl sany» atalymy boıynsha ótinim rásimdelgen. Ol sertıfıkatty festıvaldiń ashylý saltanatynda alýǵa úmit bildirdi.
Ol Namangannyń Ózbekstandaǵy mańyzdy toqyma ortalyqtarynyń biri ekenin atap ótti. Sondaı-aq Túrkııamen toqyma jáne qurylys salalarynda burynnan tyǵyz yntymaqtastyq ornaǵanyn aıtty.
Onyń aıtýynsha, jergilikti kásipkerler túrkııalyq ınvestorlarmen birge «maqtadan daıyn ónimge deıin» qaǵıdaty boıynsha birlesken jobalardy júzege asyryp jatyr.
2024–2025 jyldary Namanganǵa tartylǵan 4 mıllıard dollar sheteldik ınvestıtsııanyń shamamen 600 mıllıon dollary túrkııalyq seriktesterge tıesili ekenin aıtty.
Namangan men Isparta qalalary arasyndaǵy erekshe qarym-qatynasqa toqtalǵan Abdýrazakov eki qalanyń da «gúlder qalasy» retinde tanymal ekenin eske salyp, 2018 jyly olardyń arasynda baýyrlastyq týraly hattamaǵa qol qoıylǵanyn jetkizdi. Sonymen qatar Ispartadaǵy raýshan maıy men raýshan sýyn óndirý tájirıbesi Namangan kásipkerleri tarapynan kezeń-kezeńimen engizilip jatqanyn aıtty.
Onyń sózinshe, jyl saıyn ótetin gúlder festıvaline Túrkııadan ınvestorlar, kásipkerler men týrıster qatysady. Ol túrkııalyq qonaqtardy Namangandaǵy bul kórkem festıvalge kelýge shaqyrdy.
Buǵan deıin Ózbekstanda Qurban aıtqa oraı 10 myń balaǵa jasalatyn ota shyǵyndaryn memleket óteıtinin jazdyq.
