Ózbekstannan Dostyq kanaly arqyly Qazaqstanǵa sekýndyna 80 tekshe metr sý kelýde
Bul Qazaqstan men Ózbekstan transshekaralyq ózender boıynsha nátejıeli kelisimge qol jetkizýiniń arqasy, deıdi mınıstr orynbasary. Bul sýarmaly sý tapshylyǵy ýaqytynda vegetatsııa kezeńi qalypty jaǵdaıda ekenin kórsetedi.
Sonymen qatar, Serik Qojanııazov Túrkistan oblysy Jetisaı aýdanynda jergilikti dıhanshylar jáne aýdan ákimderimen beınekonferentsııa arqyly jıyn ótkizdi. Onda Jetisaı jáne Maqtaaral aýdandarynyń aǵyn sý máselesi kóterildi. Jetisaı aýdanynyń ákimi Murat Qydyrbek «Dostyq» magıstraldyq kanalynan jazǵy vegetatsııalyq sýarý kezinde túrli sebeptermen aýdanǵa qajetti sý kólemi jetpeı qalatynyn tilge tıek etti. Sol sebepten aýdan ákimi vıtse-mınıstrden Shardara sý qoımasynan mashınalyq ádispen sý kóterý arqyly qosymsha aǵyn sý alý úshin kanaldy qajettilikke qaraı qosýdy surady.
«Sýarmaly jerlerdi tıimdi paıdalaný máselesinde sheshilýi tıis ózekti máseleler Jetisaı aýdanynda da az emes. Aýdandaǵy 80 myń gektar sýarmaly egistik jerde 10 myńǵa jýyq agroqurylym jumys istep jatyr. Aýyl sharýashylyǵy salasynda eńbek etetin 40 myńǵa jýyq turǵynnyń kúnkórisi osy aýylsharýashylyq daqyldarynan alynǵan ónim kólemine baılanysty. Jyl saıyn memleketaralyq «Dostyq« magıstraldyq kanalynan jazǵy vegetatsııalyq sýarý kezinde túrli sebeptermen aýdanǵa qajetti sý kólemi kelmeı qalý jaǵdaılary tirkeledi. «Dostyq» magıstraldyq kanaly arqyly keletin aǵyn sý jetkiliksiz bolǵan jaǵdaıda Shardara sý qoımasynan mashınalyq ádispen sý kóterý arqyly qosymsha aǵyn sý alý úshin mashınalyq kanaldy qosýdy suraımyn«, - dedi Jetisaı aýdanynyń ákimi Murat Qydyrbek.
Alaıda Serik Qojanııazov Syrdarııa ózeni arqyly toltyrylatyn «Shardara« sý qoımasynyń negizgi qyzmeti Túrkistan jáne Qyzylorda oblystaryn aǵyn sýmen ýaqytyly qamtamasyz etý ekendigin aıtty. Bul rette atalǵan eki aýdanǵa da aǵyn sýdy jetkilikti paıdalaný kerektigin eskertti. Degenmen kóterilgen usynys atalǵan kanalda sý tapshylyǵy bolǵan jaǵdaıda sý bólý júıesine sáıkes qabyldanatynyn málimdedi.
«Biz qazir sýdyń az tsıklyndamyz. Sol sebepten osy eki aýdanǵa da jetkilikti mólsherde aǵyn sýdyń berilýin qamtamasyz etý úshin tıimdi ári únemdi paıdalanýymyz qajet. Dostyq magıstraldy kanalynda aǵyn sý jetispeýshiligi bolǵan jaǵdaıda «Mashınalyq ádispen sý kóterý« kanalyn qosý týraly sheshimdi aldaǵy kúnderi retteý, bólý júıesine sáıkes qabyldaıtyn bolamyz»- dedi vıtse-mınıstr.
Budan bólek jıynda vıtse-mınıstr ırrıgatsııalyq júıeni jáne sýarmaly jerlerdi qalpyna keltirý boıynsha atqarylǵan jumystar týraly habarlady. Máselen, qazirgi ýaqytta Qyrǵyzstanyń Toqtoǵul sý qoımasynan Syrdarııa ózeniniń arnasyna maýsym-tamyz aılarynda 330 mln.m3 sý kóleminde qosymsha sý jiberý týraly ýaǵdalastyqqa qol jetkizilgen. Osy kólemdegi sý Ózbekstan aýmaǵy arqyly kedergisiz tranzıti týraly kelisimniń baryn aıryqsha atap ótti.
