Ózbekstandyq qazaq boksshy Parıj Olımpıadasyna joldama jeńip aldy

ASTANA. KAZINFORM - Italııanyń Býsto-Arsıtsıo qalasynda ótip jatqan lıtsenzııalyq týrnırde búgin ózbekstandyq qazaq boksshysy Rýslan Abdýllaev Parıj Olımpıadasynyń joldamasyn jeńip aldy.

Atap aıtsaq, 2023 jylǵy álem chempıony atanǵan qandasymyz Rýslan Abdýllaev búgin Italııada ótip jatqan lıtsenzııalyq týrnırdiń shırek fınalynda serb boksshysy Alekseı Sendrıkpen qolǵap túıistirip, nátıjesinde qarsylasyn 3:1 esebimen jeńdi. Osylaısha ózbekstandyq qazaq boksshy jartylaı fınalǵa shyǵyp, Parıj Olımpıadasyna joldamany jeńip aldy.

Aıta ketsek, lıtsenzııalyq týrnırde jartylaı fınalǵa deıin jetken boksshylar 2024 jylǵy Olımpıada oıyndaryna joldama alady.