Ózbekstandyq qazaq boksshy kásipqoı boksta ekinshi jeńisine qol jetkizdi — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Shymkentten Qytaıdyń Sıan qalasyna tikeleı reıs ashyldy — «Halyq gazeti»
3 shildede Skat Airlines avıakompanııasynyń reısi Sıan Sıanıan halyqaralyq áýejaıynan ushyp, Qazaqstannyń Shymkent qalasyna qondy. Sóıtip Sıan qalasy el boıynsha kósh bastap, Ortalyq Azııanyń bes eli men segiz qalasyna reıs ashty, dep habarlaıdy «Halyq gazeti» basylymy.
Keltirilgen derekterge súıensek, osy jyldyń birinshi jartyjyldyǵynda Sıan Sıanıan halyqaralyq áýejaıyna Ortalyq Azııa elderinen 78 000-nan astam jolaýshylar kelip-ketip, 700-den astam reıs qatynaǵan. Bul ótken jylmen salystyrǵanda sáıkesinshe 40% jáne 19%-ǵa ósken.
Qytaılyq BAQ-tyń dereginshe, buǵan deıin Sıannan Shymkentke tóte baǵyt bolmaǵandyqtan almasyp barýǵa kem degende 12 saǵat ketetin. Bul baǵyttyń ashylýy jolaýshylar tasymalyn 5 saǵatqa deıin qysqarǵan.
Sondaı-aq osy aptada «Halyq gazeti» basylymynda «Qazaqstandyq kásiporyn Qytaıǵa kúnbaǵys maıyn eksporttaıdy» degen aqparat jarııalandy.
Bul aqparatty qytaıly BAQ Qazaqstan Respýblıkasy Aýyl sharýashylyǵy mınıstrliginiń baspasóz qyzmetine silteme jasap habarlaǵan.
Keltirilgen derekterge súıensek, qazaqstandyq Altyn Shyghys óńdeý zaýyty qytaıǵa tazartylmaǵan kúnbaǵys maıynyń partııasyn jetkizedi. Daıyn ónimdi satyp alýshy QHR astyq rezervterin qalyptastyrýǵa jaýapty Sinograin memlekettik kompanııasynyń tapsyrysy boıynsha qytaılyq CITIS Construction Co Ltd. korporatsııasy bolmaq. Ýaǵdalastyq qazaqstandyq kásiporyn bazasynda kúnbaǵys tuqymyn qaıta óńdeýdi jáne odan ári Qytaıǵa maı jiberýdi kózdeıdi.
Ózbekstandyq qazaq boksshy kásipqoı boksta ekinshi jeńisine qol jetkizdi — ÓzA
Túrkııanyń Ystanbul qalasynda ótken kásipqoı boks boıynsha «IBA.Pro 7» týrnırinde jerlesimiz Madııar Saıdrahımov jeńiske jetti, dep jazady ózbekstandyq «ÓzA».
Atalǵan aqparat kóziniń dereginshe, álem chempıonatynyń júldegeri, birneshe halyqaralyq jarystardyń jeńimpazy bolǵan Madııar bul jarysta Ázerbaıjan ókili Ahmad Mýstafaevpen 6 raýndtyq jekpe-jek ótkizgen.
Tartysty ótken jekpe-jekte 27 jastaǵy Saıdrahımov qarsylasyn upaı aıyrmashylyǵymen utty.
Aıta ketý kerek, Madııar Saıdrahımov 1997 jyly Ózbekstannyń Gazalkent qalasynda dúnıege kelgen. Ol etnıkalyq qazaq.
Madııar Saıdrahımovtyń bul jeńisi kásipqoı bokstaǵy ekinshi tabysty jekpe-jek bolǵan. Ol 2017 jyly Malaızııanyń Kýala-Lýmpýr qalasyndaǵy alǵashqy kezdesýinde de jeńiske jetken edi. Sonymen qatar, ózbekstandyq qandasymyz Kýba, Reseı sekildi elderde IBA júıesindegi jartylaı kásipqoı boks jekpe-jekterinde de laıyqty nátıjeler kórsetip keledi.
Sondaı-aq osy aptada «ÓzA»-da «Namanganda Japonııanyń áıgili sakýra aǵashy kóbeıtilmek» degen taqyryptaǵy aqparat jarııalandy.
Namanganda ótip jatqan 64-halyqaralyq «Gúlder festıvali» aıasynda sheteldik mártebeli delegatsııalardyń sapary jalǵasqan.
Atap aıtqanda, Japonııanyń Fýkýoka prefektýrasyna qarasty Daızaıfý qalasynyń meri Kýsýda Daızo Namangan oblysynyń ákimi Shavkat Abdýrazzoqovpen kezdesti.
Suhbat kezinde taraptar Namangan oblysy men Daızaıfý qalasy arasyndaǵy baılanys perspektıvalaryn talqylap, ózara aqparat almasty. Halyq sany shamamen 70 myń bolatyn Daızaıfý qalasyna jyl saıyn 10 mıllıonǵa deıin týrıst keletindigi týrızm salasyndaǵy tájirıbe almasýǵa úlken múmkindik beretinin kórsetti.
Ózbekstandyq BAQ-tyń málimetinshe, kezdesý barysynda taraptar Japonııanyń áıgili sakýra aǵashtaryn Namanganda kóbeıtý jónindegi birlesken jobalar boıynsha kelisimge kelgen.
EYU aımaqtaǵy ekonomıkalyq jáne qaýipsizdik salasyndaǵy yntymaqtastyqty damytady — ParsToday
Iran Prezıdenti Ekonomıkalyq Yntymaqtastyq Uıymy (EYU) sammıtin ekonomıkalyq, áleýmettik jáne saıası máseleler boıynsha pikir almasý, sondaı-aq aımaqtyq múddelerge sáıkes birlesken yntymaqtastyq alańdaryn qurý múmkindigi dep sanaıdy. Bul týraly osy aptada ParsToday aqparat agenttigi habarlady.
ParsToday aqparat agenttiginiń IRNA-ǵa silteme jasap habarlaýy boıynsha, Iran prezıdenti Masýd Pezeshkıan juma kúni (4 shilde) Ekonomıkalyq yntymaqtastyq uıymyna (EYU) múshe memleketter basshylarynyń 17-shi sammıtine qatysý úshin Ázirbaıjanǵa attanar aldynda óz pikirin bildirdi. Onyń aıtýynsha, bul sapar beıbitshilik pen turaqtylyq ornatyp, kórshiles elder arasyndaǵy yntymaqtastyqty arttyrady.
Pezeshkıan Ázirbaıjanǵa saparynyń Iran, Túrkııa jáne Pákistan arasyndaǵy úshjaqty qarym-qatynastar aıasynda aıqyndalǵanyn jáne 10 eldiń aımaqtyq yntymaqtastyǵynyń alǵashqy qadamy ekenin aıtqan.
Aıta keteıik, bul otyrysqa Qazaqstan, Túrikmenstan, Aýǵanstan, Ózbekstan, Tájikstan jáne Ázirbaıjan sııaqty elderdiń basshylary da qatysýda.
Eske sala ketý kerek, Ekonomıkalyq Yntymaqtastyq Uıymy aımaqtyń yntymaqtastyq damý quqyǵyna ıe, 1985 jyly qurylǵan Úkimetaralyq aımaqtyq uıym bolyp esepteledi. EYU úsh quryltaıshysy memlekettiń Iran Islam Respýblıkasy, Pákistan Islam Respýblıkasy jáne Túrkııa Respýblıkasynyń Izmır shartynyń kelisimi boıynsha qol qoıylǵan ýstav aıasynda áreket jasady.
1992 jylǵa deıin EYU sheńberindegi yntymaqtastyq eki jaqty qatynastaǵy sıpatta boldy. 1992 jyldan bastap Uıym qyzmeti jańa jeti memlekettiń Qazaqstan, Ázirbaıjan, Tájikstan, Túrkmenstan, Aýǵanstan, Qyrǵyzstan jáne Ózbekstannyń qosylýyna baılanysty belsendi túrde damydy.
Túrkııa eksportta taǵy bir tabysqa jetti — TRT
Túrkııa Afrıkanyń jeti elin Damý joly jobasy men Orta dáliz saýda baǵyty arqyly baılanystyrý maqsatynda birneshe kelisimge qol qoıdy. Bul týraly osy aptada Túrkııa Radıo Televızııa portaly habarlady.
«TRT»-nyń dereginshe, Saýda mınıstri Ómer Bolattyń málimdeýinshe Túrkııanyń eksport kólemi maýsym aıynda sońǵy 12 aıdyń ortasha kórsetkishi boıynsha 267 mıllıard dollarǵa jetip, eń joǵary deńgeıge kóterildi. Bul kórsetkish eldiń jahandyq saýdadaǵy yqpalyn kúsheıtýge baǵyttalǵan mańyzdy kezeń retinde baǵalanyp otyr.
Sondaı-aq sársenbi kúni Saýda mınıstrligi jarııalaǵan málimetterge sáıkes, tek maýsym aıynda eksport jyldyq esepte 8 paıyz ósip, 20,54 mıllıard dollarǵa jetti. Bul sońǵy bir jyl ishindegi eń joǵary aılyq ósim boldy. Osy kezeńde ımport 15,3 paıyz ósip, 28,7 mıllıard dollarǵa jetti. Bul maýsym aıyndaǵy syrtqy saýda tapshylyǵyn 8,17 mıllıard dollarǵa deıin arttyrdy, al eksport-ımportty jabý araqatynasy 71,5 paıyz bolǵan.