Ózbekstandyq BAQ-qa sholý: «Altyn qyran», birlesken jobalar, ózara kelisimder
ASTANA. KAZINFORM — Qazaqstan men Ózbekstan – Ortalyq Azııadaǵy eń yqpaldy memleketterdiń qataryna jatady. Qos eldiń saıası sabaqtastyǵy men saýda-ekonomıkalyq seriktestigin odan ári nyǵaıtý maqsatynda QR Prezıdentiniń shaqyrtýymen Ózbekstan Respýblıkasynyń Prezıdenti Shavkat Mırzıeev Qazaqstanǵa memlekettik saparmen keldi. Kóptegen mańyzdy kelisimder jasaldy. El basshylarynyń osy kezdesýi týraly ózbekstandyq BAQ ókilderi ne deıdi? Osyǵan sholý jasap kóreıik.
«Prezıdent Qasym-Jomart Toqaev Ózbekstan basshysyna baýyrlas eldiń eń joǵary memlekettik nagradasyn saltanatty túrde tabys etti», — dep jazdy Ózbekstannyń basty aqparat kózi.
Shavkat Mırzıeevke deıin «Altyn qyran» ordenimen taǵy kimder marapattalǵanyn bilesiz be? Aniq.uz portaly 1997 jyldan bastap búgingi kúnge deıin bul ordendi kimder alǵanyna sholý jasapty.
Sonymen qatar, Mırzıeevtiń Toqaevqa jáne Qazaqstan halqyna alǵys aıtqanyna da toqtalǵan.
«Ózbekstan basshysy birlesken júıeli jáne praktıkalyq kúsh-jigerdiń arqasynda Ózbekstan-Qazaqstan yntymaqtastyǵy odaqtastyq qatynastardyń eń joǵary deńgeıine kóterilgenin atap ótti», — deıdi Aniq.uz basylymy.
Ekijaqty kelissózder sońynda bekitilgen kelisimder týraly da jazylyp jatyr. Ózbekstan Prezıdenti Shavkat Mırzıeev pen Qazaqstan Prezıdenti Qasym-Jomart Toqaev Almatydaǵy Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýtynyń jáne Shyrshyq qalasyndaǵy M. Áýezov atyndaǵy Ońtústik Qazaqstan memlekettik ýnıversıtetiniń fılıaldaryn saltanatty túrde ashqany aıtylady.
«Ózbekstan men Qazaqstan joǵary oqý oryndarynyń fılıaldarynyń ózara ashylýy baýyrlas eki el arasyndaǵy kóp qyrly qarym-qatynastardyń qarqyndy damyp kele jatqanynyń taǵy bir dáleli boldy. Bul oqý oryndarynda joǵary suranysqa ıe tehnıkalyq baǵyttar boıynsha bilikti kadrlar daıyndalady», — deı otyryp ÓR Prezıdentiniń sózderinen úzindi keltiredi Kun.uz.
Sondaı-aq, Ózbekstan men Qazaqstan birlesken ınvestıtsııalyq qor qurǵysy keletini jaıly da maqala basylǵan.
«Astanada ótken kelissózder barysynda Ózbekstan men Qazaqstan prezıdentteri taýar aınalymyn 10 mıllıard dollarǵa jetkizýge, Syrdarııadaǵy Halyqaralyq ónerkásiptik yntymaqtastyq ortalyǵy men Qambarata GES-1 qurylysyn jedeldetýge kelisti. Taraptar birlesken ınvestıtsııalyq qor qurý máselesin pysyqtaıtyn bolady», — dep jazady gazeta.uz.
Sondaı-aq, gazeta.uz Ózbekstan men Qazaqstan basshylary 2024-2034 jyldarǵa arnalǵan strategııalyq seriktestik pen odaqtastyq baǵdarlamasyn bekitkenin de habarlady.
«Joǵary memleketaralyq keńestiń 1-shi otyrysynda Ózbekstan men Qazaqstan keńestiń 2024-2034 jyldarǵa arnalǵan strategııalyq áriptestik jáne odaqtastyq baǵdarlamasyn bekitý jáne Syrtqy ister mınıstrleri keńesin qurý týraly sheshimderge qol qoıdy. Memlekettik shekara rejımi týraly kelisim de qabyldandy», — dep jazady basylym.
Odan bólek, Daryo.uz saıty Ózbekstan men Qazaqstan arasyndaǵy ekonomıkalyq kelisim bekitilgenin jarııalady.
«Ortalyq Azııa» halyqaralyq ónerkásiptik yntymaqtastyq ortalyǵynyń erkin ekonomıkalyq aımaǵyn qurý týraly Ózbekstan Prezıdentiniń sheshimi qabyldandy», - dep jazady Daryo.uz.
Sheshim boıynsha «Ortalyq Azııa» halyqaralyq ónerkásiptik kooperatsııa ortalyǵynyń erkin ekonomıkalyq aımaǵy qurylady. Ortalyqtyń qyzmetin basqarý «Syrdarııa erkin ekonomıkalyq aımaǵynyń dırektsııasy» ýnıtarlyq kásipornyna júktelgen.
Ónerkásiptik kooperatsııa ortalyq aýmaǵyndaǵy óndiris protsesine ónerkásiptik kásiporyndardy tartý jáne ımportty almastyratyn ónim shyǵarýdy jolǵa qoıý arqyly keńeıtiletin bolady.
Sondaı-aq, Ózbekstan men Qazaqstan arasynda 7 mıllıard dollarlyq mámileler men kelisim-sharttar portfeli ázirlengenin habarlaǵan.
«Ónerkásiptik kooperatsııany damytý maqsatynda aǵymdaǵy sammıtke deıin jalpy quny 7 mıllıard dollardy quraıtyn jańa kelisimder men kelisim-sharttar portfeli ázirlendi», — dep jazady Xabar.uz.
Olardyń qatarynda energetıka, kólik-logıstıka, metallýrgııa, toqyma ónerkásibi, aýyl sharýashylyǵy jáne qurylys salalaryndaǵy jobalar, sondaı-aq óńiraralyq jobalar bar.
«Syrdarııa aýdanynda Halyqaralyq ónerkásiptik kooperatsııa ortalyǵynyń qurylysyn jedeldetip, onda kásiporyndardy ornalastyrý kelisildi.
Іri jobalardy qarjylyq qoldaý maqsatynda Birlesken ınvestıtsııalyq qor qurý máselesi pysyqtalatyn bolady», — dep habarlady basylym.
