Ózbekstandaǵy kedeılik deńgeıi 11 paıyzǵa deıin tómendedi

TAShKENT. KAZINFORM – Bir jyl ishinde Ózbekstandaǵy kedeılik deńgeıi 3,1%-ǵa qysqardy. Bul týraly Jumyspen qamtý jáne kedeılikti azaıtý mınıstrliginen málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

 

16 myń úı sharýashylyǵynda júrgizilgen baqylaýlarǵa saı, Ózbekstandaǵy kedeılik deńgeıi 2023 jyldyń sońyna qaraı 14-ten 11%-ǵadeıin tómendegen.

«Eldegi kedeılik deńgeıi ótken jylmen salystyrǵanda 3,1%-ǵa qysqaryp, 11% boldy. 2022 jyldyń qorytyndysy boıynsha bul kórsetkish 14%-dy quraǵan edi», - dep málim etti mınıstrlikten.

Vedomstvo aqparatyna saı, Ózbekstannyń barlyq aımaqtarynda kedeılik deńgeıi tómendegen. Máselen, Syrdarııa (19,5%-dan 13,8%-ǵa) men Andıjan (17,4%-dan 11,9%-ǵa) oblystarynda jáne Qaraqalpaqstanda(19,9%-dan 13,7%-ǵa deıin) aıtarlyqtaı azaıdy. Al Tashkent (8,5%-dan 7,9%-ǵa), Buhara (11,9%-dan 11,8%-ǵa) jáne Qashqadarııa (12,7% - dan 11,5% - ǵa deıin) oblystarynda tómendeý kórsetkishi baıaýlaý.

Mınıstrlikten málim etkendeı, byltyr 4,1 mln azamat jumysqa ornalastyrylǵan. Onyń ishinde 2,3 mln adam turaqty jáne maýsymdyq jumystarǵa, 112,8 myń ózbekstandyq aqyly qoǵamdyq jumystarǵa tartylsa, taǵy 1,6 mıllıony ózin-ózi qyzmetpen qamtyǵan.

«20 myń kásipker jáne 500 myń bilikti maman» baǵdarlamasy aıasynda 6,7 myń kásiporynmen kelisim jasaldy. Onyń nátıjesinde 455 myń turǵynjumysqa ornalasty. 181 myń jumyssyz azamat túrli kásip boıynsha bilim alyp, 183,8 myń jańa bıznes sýbektisi quryldy.

Sondaı-aq, 51 myń mıkrojobany iske asyrý nátıjesinde 206 myń jańa jumys orny ashyldy. Áleýmettik az qamtylǵan otbasylar úshin jeke baǵdarlamalar qolǵa alynyp, sonyń esebinen byltyr 208 myń januıadaǵy 873 myń adam kedeılik sheginen shyǵaryldy.