Ózbekstandaǵy qazaqtar Naýryzdy qalaı atap ótedi
TAShKENT. KAZINFORM – Bıyl Naýryz meıramynyń dúnıejúzilik materıaldyq emes muralar tizimine engenine - 15 jyl. Búginde álemniń 30-dan astam eli bul kúndi keń aýqymda atap ótedi. Keıingi kezderi ol el ishinde ıgi úrdisterdi qalyptastyratyn kúshke aınalyp keledi. Bul rette Ózbekstandaǵy qazaqtar da ulyq meıramdy erekshe ekshep, joǵary deńgeıde merekeleıdi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Qaraqalpaqstandaǵy qazaqtar úshin Naýryz – kóp merekeniń biri emes. Munda bul meıramnyń mańyzy men onyń barsha adamzatty ıgilikke bastaıtyn qundylyǵyna asa mán beriledi. Atalǵan mereke tek bir kún toılanbaıdy. Ol kórisý kúninen bastalyp, aıdyn sońyna deıin jalǵasady. Osy aralyqta barlyǵy ulttyq kıimderimizdi kıip, jarysa jaqsy is jasaýǵa jumylady.
Sonymen qatar, qaraqalpaq jerindegi qandastar shalǵaıdaǵy aǵaıynǵa arnap dastarhan jaıyp, sporttyq saıystar men kontserttik baǵdarlamalar uıymdastyrady.
«Umyt qalyp bara jatqan dástúrimizdi qaıta jańǵyrtý, ony artymyzdan ergen býynǵan úıretý maqsatynda osylaı keń kólemde atap ótemiz. Naýryzdy amal merekesinen bastaımyz jáne bir-birimizge izgi tilek-nıetimizdi aıtyp, jyly lebizimizdi bildiremiz. Bul barsha adamzatty ıgilik pen izgilikke jeteleıtin meıram dep sanaımyz. Sondyqtan osy mereke ortaq sanalatyn barsha baýyrlas halyqtardy quttyqtaımyn!» - dep tilek bildirdi Qaraqalpaqstandaǵy qazaq mádenı ortalyǵynyń múshesi Qarý Qaımoldaev.
Naýryz tek jekelegen óńirlerge ǵana emes, Ózbekstannyń ár aımaǵynda asa joǵary mańyz berile otyryp merekelenedi. Onyń ishinde qazaqtar kóp qonystanǵan oblystardyń biri Naýaıde de erekshe atalyp ótedi. Mundaǵy jurt bir-birimen tatý, ult pen ulysqa bólinbeıdi. Qazaq, ózbek, qaraqalpaq bolyp, kún men túnniń teńelip, Jer-Ananyń býsanǵan shaǵynda óńirdi merekege bóleıdi.
«Ansamblimiz Qazaqstannan, kórshi elderden keletin qonaqtarǵa qyzmet jasap keledi. Ózimiz ulttyq dástúrlerimizdi kórsetip, kóbine osy ata-babamyzdyń halyq ánderin oryndaımyz. Ásirese, Naýryz merekesinde munda kontserttik sharalar uıymdastyrylyp, halyqqa kóterińki kóńil-kúı syılaýǵa tyrysamyz. Jalpy, ózimiz turyp jatqan óńirde ulttyq dástúrlerimiz ben qundylyqtarymyzdy qatań saqtaımyz jáne ony keler býynǵa nasıhattap kelemiz», - dedi Kenımeh aýdandyq mádenıet úıiniń qyzmetkeri Muqaǵalı Maralov.
Bul rette Tashkent qazaqtary da biregeıligin saqtap keledi. Ásirese, ulttyq kıim kıip, mýzykalyq aspaptaryn alyp, merekelik kóńil-kúımen ortalyq alańǵa betteıtin jastar kóp. Sol arqyly tól mádenıetin dáriptep, «jyl jemisti bolsyn» degen tilekpen kópshilikke án aıtyp, ónerlerin pash etedi.
Aıta keteıik, Qazaqstan men Ózbekstan áýel bastan osy ulyq meıramdy ıÝNESKO-nyń materıaldyq emes muralar tizimine engizý úshin kóp kúsh jumsady. Bul rette birlese áreket etti. Qazir Naýryz búkil álemge halyqaralyq jańarý kúni retinde tanylǵan. Al, jer-jerde uıymdastyrylatyn mádenı sharalar baýyrlas elderdi jaqsylyqqa úndep, ıgi isterge uıystyratyn erekshe kúshke aınalǵandaı.
