Ózbekstanda JOO-larǵa túsý talaptary kúsheıedi
TAShKENT. KAZINFORM – Ózbekstanda joǵary oqý oryndaryna túsý úshin shekti baldyń mólsheri ózgeredi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstannyń joǵary bilim, ǵylym jáne ınnovatsııa mınıstrliginiń málimetinshe, oqýǵa túsý úshin talap etiletin shekti baldyń mólsheri eki ese joǵarylaıdy.
«Oqýǵa túsý úshin qajetti eń tómengi ball eki ese ulǵaıtylyp, densaýlyq saqtaý, quqyq, bıznes jáne basqarý mamandyqtary boıynsha - 94,5, qalǵan baǵyttarǵa 75,6 (qazir barlyq baǵyttar boıynsha 56,7 ball) ball deńgeıinde belgilenedi», - dep málim etti mınıstrliktiń baspasóz qyzmetinen.
Sondaı-aq, memlekettik joǵary oqý oryndarynda granttyq negizde bilim alǵan stýdentterge oqýdy bitirgennen keıin 3 jyl mindetti jumys isteý talaby alynyp tastalady.
Buǵan qosa áleýmettik jáne gýmanıtarlyq baǵyttarǵa bólinetin memlekettik tapsyrystyń sany qysqarady, tıisinshe ol kvotalar ınjener, medıtsına jáne jaratylystaný ǵylymdaryna baǵyttalady.
