Ózbekstanda jyl basynan beri 4,7 myń adam bas bostandyǵynan aıyryldy
TAShKENT. KAZINFORM — Ózbekstan Joǵarǵy soty 2025 jyldyń birinshi toqsanynda respýblıka sottary qaraǵan qylmystyq isterdiń statıstıkasyn usyndy.
Osy kezeńde 19 myń 646 tulǵaǵa qatysty 15 myń 681 qylmystyq is qaralyp, 108 tulǵa aqtalǵan.
Sottalǵandar sany 15369 bolsa, onyń 4764-i bas bostandyǵynan aıyrýǵa, 10319-y basqa jaza túrlerine, 286-sy shartty túrde sottalǵan. Sottalǵandardyń 13611-i erler, 1708-i áıelder, 6066-sy jastar (onyń ishinde 702-si kámeletke tolmaǵandar), 601-i 60 jastan asqandar.
Sotta bas bostandyǵynan aıyrýmen baılanysty emes jaza taǵaıyndalýyna baılanysty 2042 adam sot zalynan bosatyldy. Sondaı-aq 8181 adam bas bostandyǵynan aıyrý oryndarynan shartty túrde bosatylsa, 2746-nyń jazasy jeńildetilgen merzimge aýystyryldy.
Aldyn ala tergeý organdary tarapynan negizsiz 3765 adamǵa taǵylǵan aıyptar alynyp tastaldy nemese basqa sanatqa aýystyryldy. Kepildik hattar boıynsha 27 tulǵa bas bostandyǵynan aıyrýmen baılanysty emes jazaǵa kesildi.
Esepti kezeńde qaralǵan qylmystyq isterdiń kópshiligi:
alaıaqtyq;
jol qozǵalysy nemese kólik quralyn paıdalaný qaýipsizdigi erejelerin buzý;
urlyq;
esirtki qylmystary;
bótenniń múlkin ıemdený nemese jymqyrý;
qujattardy, mórtabandardy, mórler men blankilerdi daıyndaý, jalǵan jasaý, ótkizý nemese paıdalaný;
buzaqylyq;
qasaqana jeńil dene jaraqatyn keltirý;
densaýlyqqa qasaqana ortasha aýyrlyqtaǵy zııan keltirý sııaqty qylmysty quraıdy.
Sondaı-aq tatýlastyrý ınstıtýtyn qoldaný nátıjesinde 3 429 tulǵa qylmystyq jaýapkershilikten bosatyldy.
Apellıatsııalyq tártipte 2706 tulǵaǵa qatysty 2064 qylmystyq is qaraldy. Birinshi satydaǵy sottardyń 92 tulǵaǵa qatysty shyǵarǵan qaýlylarynyń kúshi joıylyp, 825 tulǵaǵa qatysty shyǵarylǵan sot sheshimderi ózgertildi.
Kassatsııalyq tártipte 1523 tulǵaǵa qatysty 1330 qylmystyq is qaraldy. Birinshi satydaǵy sottardyń 115 tulǵaǵa qatysty shyǵarǵan qaýlylarynyń kúshi joıylyp, 475 tulǵaǵa qatysty shyǵarylǵan sot sheshimderi ózgertildi.
Tekserý tártibimen 1598 tulǵaǵa qatysty 1360 qylmystyq is qaraldy. Tómengi satydaǵy sottardyń 46 tulǵaǵa qatysty shyǵarǵan qaýlylarynyń kúshi joıylyp, 268 tulǵaǵa qatysty shyǵarylǵan sot sheshimderi ózgertildi.
Joǵarǵy Sottyń qylmystyq ister jónindegi alqasynda 286 tulǵaǵa qatysty 240 qylmystyq is qaraldy. Tómengi satydaǵy sottardyń 58 tulǵaǵa qatysty shyǵarǵan qaýlylarynyń kúshi joıylyp, 87 tulǵaǵa qatysty shyǵarylǵan sot sheshimderi ózgertildi.
Esterińizge sala keteıik, Ózbekstanda jeke tulǵalardyń shetelden taýar ákelýine shekteýler kúsheıtilgeni týraly habarlaǵanbyz.