Ózbekstanda tsement zaýyttaryn salýǵa tyıym salynbaq
TAShKENT. KAZINFORM – Ózbekstanda tsement zaýyttaryn salýǵa moratorıı jarııalanýy múmkin. Bul týraly Olıı Májilistiń zań shyǵarý palatasynda baıandama jasaǵan Ózbekstan Ekologııa, qorshaǵan ortany qorǵaý jáne klımattyń ózgerýi mınıstri Azız Abdýhakımov málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Vedomstvo basshysynyń aıtýynsha, búginge deıin salynǵan 47 zaýyttyń 23-i jumysyn toqtatty. 25 kásiporynnyń jumysyn zerdeleý barysynda olardyń 90%-y ekologııalyq talaptardy buzǵany anyqtalǵan.
Osyǵan baılanysty Ózbekstan úkimeti tsement zaýyttaryn salýǵa moratorıı jarııalaýdy josparlap otyr. Azız Abdýhakımov atap ótkendeı, keıbir kásiporyndar týrızmdi damytýǵa qolaıly taýly aımaqtarda ornalasqan.
«Biz birneshe faktilerdi zerttep kórdik. Jeke ózim tsement zaýyty ornalasqan Jızaq oblysynyń Zafarabad aýdanyna bardym. Onda aǵashtar men onyń aınalasyndaǵy 5-10 shaqyrym aýmaqty shań basqan. Bul ósimdikter men janýarlar álemine zalal kelip jatqanyn aıǵaqtaıdy. Munymen qatar qazirgi zańnamaǵa da taldaý jasap kórdik. Búginde osyndaı olqylyqtar úshin zaýyttarǵa tek 100-200 mln sým (3,6-7,2 mln teńge) aıyppul qarastyrylǵan», - dedi mınıstr.
Azız Abdýhakımov kásiporyndardy zamanaýı shań-gaz súzgilerin ornatýǵa májbúrleý úshin aıyppul mólsherin eń kemi 10 mlrd sým (362 mln teńge) kóleminde belgileý josparlanǵanyn aıtty.
«Ózbekstandaǵy tsement zaýyttary qazirgi qajettilikten birneshe ese kóp kólemde ónim óndirip jatyr. Bul másele premer-mınıstr bastaǵan úkimet otyrysynda talqylandy. Onda budan bylaı jańa tsement zaýyttarynyń qurylysy bolmaıdy degen sheshim qabyldandy. Bálkim moratorıı jarııalanady», - dedi Azız Abdýhakımov.
Eske salaıyq, Ózbekstanda aýa sapasy nasharlaǵanda kásiporyndardyń jumys ýaqyty shektelýi múmkin ekenin habarlaǵan bolatynbyz.
Sonymen qosa, buǵan deıin ekologııalyq ahýaldy jaqsartý úshin Ózbekstan astanasynda avtokólikterge qatysty birqatar shekteý engizý usynylǵanyn jazyp edik. Atap aıtqanda, AI-80 janarmaıyn paıdalanýǵa tyıym salý, 2010 jylǵa deıin shyǵarylǵan barlyq avtokólik quraldarynyń qozǵalysyna shekteý qoıý jáne kómir men mazýtty paıdalanýdan bas tartý usynyldy.
