Ózbekstanda suıytylǵan gaz qymbattady

TAShKENT. KAZINFORM — Ózbekstanda ımporttyń artýyna baılanysty suıytylǵan gaz baǵasy ósti, dep habarlaıdy Kazinform agenttiginiń menshikti tilshisi.

Energetıka mınıstrliginiń málimetinshe, byltyr bırja arqyly 358 myń tonna suıytylǵan gaz satyldy. Onyń 61 paıyzy jergilikti ónim bolsa, qalǵany ımporttyń úlesinde. 

2025 jyly gazdyń bastapqy baǵasy ózgergen joq. Atap aıtqanda, jergilikti ónimniń quny tonnasyna 7 mln sýmnan aspady (294 myń teńge), al ımporttalǵan taýardyń baǵasy 8 mln sým (337 myń teńge) shamasynda boldy.

Vedomstvonyń aqparatyna saı, jergilikti jáne ımporttalatyn gaz qunynyń arasyndaǵy aıyrmashylyq 40%-ǵa deıin jetti.

Endi shetelden satyp alynatyn ónim kólemi men baǵasynyń artýyna baılanysty suıytylǵan gazdyń bir tonnasy 9,5 mln sýmdy shamalaıdy. Tıisinshe, jeltoqsan aıymen salystyrǵanda atalǵan ónim 20%-ǵa qymbattady.

Osyǵan baılanysty Ózbekstannyń Básekelestik jónindegi komıteti óz ókilettigi aıasynda baǵany turaqtandyrý boıynsha jedel shara qabyldap, turaqty monıtorıng júrgizbek.

Eske salaıyq, 8 qańtardan bastap Ózbekstanda gaz quıý stantsııalarynyń jumysyna shekteý engizildi. 

Buǵan deıin habarlaǵanymyzdaı, Ózbekstanda gaz óndirisi tómendep barady. 2025 jyly 10 aıda kórshiles elde 35,5 mlrd tekshe metr gaz óndirildi, bul 2024 jyldyń sáıkes kezeńimen salystyrǵanda 5,3%-ǵa az.