Ózbekstanda Sátbaev ýnıversıtetiniń ókildigi ashylady

TAShKENT. QazAqparat – Sátbaev ýnıversıtetiniń ókildigi Tashkenttegi Kıme halyqaralyq ýnıversıtetiniń (Kimyo International University in Tashkent) bazasynda ashylady, dep habarlaıdy QazAqparat QR Ǵylym jáne joǵary bilim mınıstrligine silteme jasap.

«Sátbaev ýnıversıtetiniń rektory Meıram Begentaev bastaǵan delegatsııa Tashkenttegi Kıme halyqaralyq ýnıversıtetinde boldy. Sapar barysynda eki ýnıversıtet Tashkenttegi Kıme halyqaralyq ýnıversıtetiniń bazasynda Sátbaev ýnıversıtetiniń ókildigin ashý nıeti týraly kelisimge qol qoıdy.

Qol qoıylǵan kelisim ǵylym jáne joǵary tehnıkalyq bilim salasyndaǵy yntymaqtastyqty, sondaı-aq birlesken baǵdarlamalardy ázirleýdi kózdeıdi. Osylaısha, Sátbaev ýnıversıteti Tashkentte ǵaryshtyq ınjenerııa, IT-tehnologııalar, materıaltaný jáne mashına jasaý sııaqty bilim berý baǵdarlamalaryn ashýdy josparlap otyr», - delingen habarlamada.

Málim etilgendeı, qazir Kıme halyqaralyq ýnıversıteti 5 joǵary oqý ornynan turady.

Sátbaev ýnıversıtetiniń Ózbekstandaǵy ókildigi ózbekstandyq stýdentterge ınjenerlik-tehnıkalyq salada sapaly bilim alýǵa múmkindik beredi jáne Qazaqstan men Ózbekstan arasynda ǵylym men joǵary tehnıkalyq bilim salasyndaǵy yntymaqtastyqty damytýda mańyzdy qadam bolmaq.

Kıme halyqaralyq ýnıversıteti – Ózbekstandaǵy alǵashqy jeke joǵary oqý orny. Ol 2018 jyly Tashkenttegi Edjý tehnıkalyq ınstıtýty retinde qurylǵan.