Ózbekstanda QR ekonomıkasyn tsıfrlandyrý jaıy talqylandy

TAShKENT. QazAqparat - Tashkentte Qazaqstan jáne Ózbekstan sarapshylarynyń qatysýymen dóńgelek ústel ótti, dep habarlaıdy «QazAqparat» HAA-nyń menshikti tilshisi. 

Ony Qazaqstan Respýblıkasynyń Ózbekstandaǵy Elshiligi uıymdastyrdy. Sharada «QR Prezıdentiniń bes áleýmettik bastamasy», QR Prezıdentiniń «Bolashaqqa baǵdar: rýhanı jańǵyrý» baǵdarlamalyq maqalasy, «Tsıfrlyq Qazaqstan jáne EAEO tsıfrlyq kún tártibi», sondaı-aq «Ortalyq Azııa óńiri jáne onyń QHR-men yntymaqtastyq aıasynda damýy» taqyryptary talqyǵa salyndy.

Dóńgelek ústelde Qazaqstan Respýblıkasynyń Ózbekstandaǵy Tótenshe jáne Ókiletti Elshisi Erik Ótembaev, QR Internet qaýymdastyǵynyń prezıdenti Shavkat Sabyrov, sondaı-aq qazaqstandyq sarapshylar Marat Shıbutov pen Tatıana Kaýkenova sóz sóıledi.

Sharada QR azamattaryn baspanamen qamtamasyz etýdiń basty baǵyttary, salyq júktemesin azaıtý, joǵary bilimniń qoljetimdiligin arttyrý, sondaı-aq shaǵyn nesıe, eldi gazdandyrý máseleleri talqylandy.

QR Internet qaýymdastyǵynyń basshysy Shavkat Sabyrov Qazaqstannyń elektrondy úkimet portalynda tsıfrlyq qoltańbany qoldaný arqyly elektrondy memlekettik qyzmet kórsetýdi engizgen alǵashqy elderdiń biri ekenin aıtty.

«18 mln halqy bar Qazaqstanda 14 mln bank esep-shoty bar. Eger bankte esep-shotyńyz bolsa, salyqtar men qyzmetterdi tsıfrlyq formatta tóleı alasyz degen sóz. Al ÓR Ortalyq bankiniń málimetinshe, Ózbekstan halqynyń sany 32 mln bolǵanymen, ashylǵan bank esep-shotynyń sany 8 mln ǵana. Ótken jyly ınternet-bankıng qyzmetin paıdalanatyn halyq sany 4 mln 200 myń adamdy quraǵan. Ekonomıkanyń damyp, tsıfrlandyrý úderisiniń sátti júrgizilýi úshin onlaın bankıngti paıdalanatyn adamdardyń sany artýy tıis. Tsıfrlyq ekonomıkada onlaın bankıngti paıdalanatyn zańdy tulǵalardyń sany jeke tulǵalardan da kóp bolýy qajet», - dedi ol.