Ózbekstanda Qazaqstan Respýblıkasynyń Táýelsizdik kúni toılandy

TAShKENT. QazAqparat - Qazaqstan Respýblıkasy Táýelsizdiginiń 26 jyldyǵyna oraı Qazaqstannyń Ózbekstandaǵy elshiligi ulttyq akademııalyq drama teatrynda saltanatty shara jáne kontsert uıymdastyrdy, dep habarlaıdy «QazAqparat» HAA-nyń menshikti tilshisi.

Saltanatty sharaǵa ÓR úkimetiniń ókilderi, memlekettik mekemeleriniń basshylary, sondaı-aq dıplomatııalyq korpýstardyń, halyqaralyq uıymdardyń ókilderi qatysty.

Qazaqstannyń Ózbekstan Respýblıkasyndaǵy Tótenshe jáne ókiletti elshisi Erik Ótembaev 2017 jyldyń Ózbekstanmen yntymaqtastyqty keńeıtýge múmkindik bergendigimen este qalatynyn aıtty.

«Bıyl Ózbekstan Qazaqstan Respýblıkasy syrtqy saıasatynda aıtarlyqtaı jetistikterge qol jetkizgen vektor bolyp otyr. Eki memlekettik sapar saıası, ekonomıkalyq jáne mádenı ómirimizdiń barlyq baǵyttaryna qarqyn berdi», - dedi QR elshisi.

Sondaı-aq Erik Ótembaev Ózbekstan, Túrikmenstan jáne Qazaqstan arasynda túıisý núktesine qol qoıylyp, bizdiń el kórshi eldermen aradaǵy shekarany delımıtatsııalaý jáne demarkatsııalaý máselesinde jaqsy úlgi kórsetkenin tilge tıek etti. Budan tys, Qazaqstan men Ózbekstan shekaradan ótý jónindegi jańa protsedýralarǵa qatysty máselelerdi talqylap, aldaǵy ýaqytta taýar aınalymyn arttyrýǵa, eki eldiń týrızm áleýetterin kóterýge jaǵdaı jasaıtyn jol kartasyn qabyldady.

Shara sońynda Qazaqstan elordasynyń fotosýretteri kórmesi, sondaı-aq «Tumar» jáne «Qazyna» folklor-bı ansamblderiniń qatysýymen kontsert uıymdastyryldy.