Ózbekstanda qazaq tilin oqytý jańa qarqyn alady
«Búgin tarıhı oqıǵa oryn aldy. Ózbekstannyń Qazaqstandaǵy jyly aıasynda Qazaqstan halqy Assambleıasy men Ózbekstan Mınıstrler kabıneti janyndaǵy Ultaralyq qatynastar men dostyq baılanystar komıteti arasyndaǵy yntymaqtastyq týraly memorandýmǵa qol qoıyldy. Memorandým qazirdiń ózinde is júzinde júzege asyrylyp jatqan sharalardy zańdy túrde bekitip otyr», - dedi ol.
Sonymen qatar ol qazaq pen ózbek baýyrlas halyq ekenin, dini men tarıhy tamyrlas ekendigin basa aıtty.
«Qazaqstanda shamamen 400 myń ózbek, al Ózbekstanda 450 myńnan astam qazaq turady. Elderimizdegi barlyq ulttar men ulystardyń tatý-tátti ómir súrýine barlyq jaǵdaı jasap otyrǵan aqyldy basshylarymyzdyń qyzmetin aıryqsha atap ótken jón. Bizdiń kóptegen meıramdarymyz Qazaqstanmen ortaq bolyp keledi. Al búgingi qol qoıylǵan memorandým qarym-qatynastarymyzdy barynsha joǵary deńgeıge kóterýge jáne ony jańa shyǵarmashylyq bastamalarmen baıyta túsýge múmkindik beredi», - dedi komıtet basshysy.
Rýstam Kýrbanov Qazaqstanda ózbek tilin, al Ózbekstanda qazaq tilin oqytý máselelerine de toqtaldy.
«Kelesi jyly Ózbekstanda Qazaqstan jylynyń ótetindigin eskere otyryp, osy memorandým aıasynda birneshe iri shara belgilenip otyr jáne ony júzege asyrýdyń Jol kartasyn qurýǵa kelistik. Barlyq belgilengen sharalar barynsha qatań baqylaýmen oryndalatyn bolady. Birqatar shara tarıhty zerdeleýge, sýretshilerimizdiń birlesken jumystaryna baǵyttalmaq. Memorandýmda Qazaqstanda ózbek tilin, Ózbekstanda qazaq tilin oqytýǵa birlesip járdem kórsetý jaıynda aıtylǵan. Bizde qazaq tilinde bilim beretin 100-ge jýyq mektep, pedagogıkalyq ýnıversıtetterde qazaq tili muǵalimderin daıyndaıtyn 3 fakýltet bar. Al Qaraqalpaqstanda tildi oqytyp qoımaı matematıkadan, fızıkadan jáne basqa da pánderden qazaq tilinde pedagogtar daıyndaıdy. Memorandým bul jumystardy keńeıtip, ony jańa mazmunmen baıytýǵa septigin tıgizedi», - dedi Rýstam Kýrbanov.
Aıta keteıik, elordanyń 20 jyldyń mereıtoıyna oraı Azııadaǵy ózara senim sharalar keńesi ulttyq-mádenı ortalyqtarynyń azamattyq forýmy ótip jatyr. Shara aıasynda «Astana - uly dala eliniń jaýhary» atty fotokórme men óńirlerden kelgen qatysýshylardyń sándik-qoldanbaly óneriniń kórmesi uıymdastyrylǵan. Sonymen qatar AÓSShK elderi ulttyq-mádenı ortalyqtarynyń qatysýymen Astananyń 20 jyldyǵyna arnalǵan flesh-mob ta ótti.
