Ózbekstanda qazaq kınosynyń kúnderi ótip jatyr
TAShKENT. KAZINFORM – Búgin Ózbekstanda qazaq kınosynyń kúnderi bastaldy, dep habarlaıdy Kazinform agenttiginiń menshikti tilshisi.
Eki eldiń mádenı baılanysyn nyǵaıtýǵa baǵytalǵan is-shara Á.Naýaı atyndaǵy Ulttyq kınoóner saraıynda ótip jatyr. Qazaqstannyń óner maıtalmandary 2 kún ishinde ózbekstandyq kórermenniń nazaryna «Ámire», «Dos-Muqasan» jáne «Paralımpıadashy» fılmderin usynady.
– Mádenı baılanystardy úzbeı, ony ary qaraı damyta túsý – óner adamdaryna júktelgen jaýapty mindet. Esterińizde bolsa bizdiń maqtanyshymyz Nurmuhan Jantórın aǵamyz «Ózbekfılmniń» kóptegen týyndysyna tústi. Táýelsizdik alǵannan keıin elder arasyndaǵy osy saladaǵy baılanys báseńdep qalyp edi. Al qazir osy olqylyqty joıyp, tyǵyz yntymaqtastyqqa bet aldyq, - dedi akter, QR Eńbek sińirgen qaıratkeri Baqytjan Álpeıisov.
Іs-sharanyń alǵashqy kúni qazaqtyń birtýar tulǵasy, ánshi Ámire Qashaýbaev týraly «Ámire» fılmi kórsetildi. Jınalǵan qaýym týyndyny erekshe yqylaspen tamashalap, joǵary baǵa berdi.
– Bul fılmdi 2016 jyly Latvııada túsirgenbiz. Týyndyda kóptegen sheteldik bilikti maman tóbe kórsetti. Kınoda qazaqtyń birtýar tulǵasy Ámire Qashaýbaevtyń ómiri men óneri baıandalady. Endi osy fılmdi ózbekstandyq kórermenge usyný — biz úshin mártebe. Osy arqyly tarıhı tulǵalardyń ónegesin nasıhattaı alamyz, - dep toqtaldy qazaqstandyq akter Sanjar Mádıev.
14 jeltoqsanda Á.Naýaı atyndaǵy Ulttyq kınoóner saraıynda «Dos-Muqasan» jáne «Paralımpıadashy» fılmderi kórermen nazaryna usynylady. Kınolardy tamshalaý tegin.
Eske sala keteıik, osydan bir aı buryn da ózbekstandyqtar nazaryna qazaq kınolary usynylǵan bolatyn. Ol joly is-shara Ortalyq Azııa memleketteri basshylarynyń jetinshi Konsýltatıvtik kezdesýi qarsańynda uıymdastyrylǵan.
Qosa ketsek, buǵan deıin Kazinform agenttigine suhbat bergen ózbekstandyq sarapshylar qazaq-ózbek yntymaqtastyǵy yqtımal qaterlerdi birlese eńserýge qaýqarly ekenin málimdep edi.