Ózbekstanda qansha qazaq turyp jatyr
ASTANA. KAZINFORM — Qazaqstan men Ózbekstannyń mádenı-gýmanıtarlyq saladaǵy yntymaqtastyq óńirlik saıasattaǵy negizgi basym baǵyttardyń biri. Prezıdenttiń dál osy sózin Senat tóraǵasy Máýlen Áshimbaev búgin qazaq-ózbek zııaly qaýymynyń forýmynda keltirdi.
— Qazaqstan Prezıdenti Qasym-Jomart Toqaev Ózbekstanmen mádenı-gýmanıtarlyq saladaǵy yntymaqtastyqtyń óńirlik saıasattaǵy negizgi basymdyqtardyń biri ekenin birneshe ret atap ótti. Asa mańyzdy róldi baýyrlas halyq arasyndaǵy dostyqty qalyptastyratyn jáne nyǵaıtatyn adamı baılanys atqarady. Búginde Qazaqstanda 600 myńnan astam etnıkalyq ózbek turyp jatyr. Memleket olarǵa ana tilin úırenýine, mádenıetin damytýyna jáne dástúrin saqtap qalýyna barlyq jaǵdaıdy jasaǵan. Ózbek tilindegi mektepter, teatrlar, ádebı birlestikter, buqaralyq aqparat quraldary tabysty jumys istep keledi, — dedi Máýlen Áshimbaev elordada ótken qazaq-ózbek zııaly qaýymynyń alǵashqy forýmynda.
Spıker keltirgen málimetke sáıkes, búginde Ózbekstan 800 myńnan astam qazaq úshin týǵan shańyraqqa aınalyp otyr.
— Ózbekstanda respýblıkalyq qazaq mádenı ortalyǵy jumys isteıdi, qazaq tilin oqytý jáne ulttyq dástúrdi saqtaý baǵdarlamasy júzege asyrylyp jatyr. Mádenıetpen almasý men yntymaqtastyqty nyǵaıta túsýde jastarǵa erekshe ról júkteledi. Qazir eki eldiń jastary forýmda ǵana emes, kúndelikti áleýmettik jelilerde, onlaın-jobalarda, birlesken shyǵarmashylyq jáne startap-bastamalar arqyly aralasady. Sportshylarymyzǵa birge jankúıer bolyp, bir-biriniń jeńisine shyn júrekten qýanady. Ózbekstan quramasy tarıhta alǵash ret fýtboldan álem chempıonatynyń fınaldyq kezeńine shyqqanda, myńdaǵan qazaqstandyq ózbek aǵaıynnyń qýanyshymen quttyqtap, qoldaý kórsetti. Bul shynaıy ózara qoldaý, birliktiń aıqyn dáleli. Sondyqtan birlesken bilim berý baǵdarlamalaryn iske asyrý, ózara tájirıbe almasý, kreatıvti jáne IT-jobalardy keńeıtý mańyzdy. Jyl saıyn Qazaqstan men Ózbekstan jastarynyń kongresi ótedi, birneshe kún buryn (14-15 tamyzda) Tashkent qalasynda kezekti kongress uıymdastyryldy, — deıdi tóraǵa.
Búgin Astanada qazaq-ózbek zııaly qaýymynyń alǵashqy forýmy ótti. Alǵash uıymdastyrylǵan forýmǵa Senat tóraǵasy Máýlen Áshimbaev jáne Ózbekstan Olıı Májilisi Senatynyń tóraǵasy Tanzıla Narbaeva bastaǵan qazaq-ózbek ǵylymı-shyǵarmashylyq zııaly ókilderi qatysty.
Buǵan deıin Senat tóraǵasy Máýlen Áshimbaev Qazaqstan men Ózbekstan qarym-qatynasy buryn-sońdy bolmaǵan bıik deńgeıge kóterilgenin basa aıtqan edi.
Aıta keteıik, keshe Prezıdent Qasym-Jomart Toqaev Ózbekstan Olıı Májilisi Senatynyń tóraǵasy Tanzıla Narbaevany qabyldady.