Ózbekstanda «Han Sultan. Altyn Orda» operasynyń premerasy ótti
ASTANA. KAZINFORM – Tashkentte Qazaqstan Prezıdenti Qasym-Jomart Toqaevtyń Ózbekstanǵa memlekettik sapary aıasynda Abaı atyndaǵy Qazaq ulttyq opera jáne balet teatry usynǵan «Han Sultan. Altyn Orda» operasynyń premerasy ótti. Qoıylym Ortalyq Azııa aımaǵynyń mádenı ómirindegi eń jarqyn oqıǵalardyń biri boldy. Bul týraly Mádenıet jáne aqparat mınıstrligi habarlady.
Opera Álisher Naýaı atyndaǵy Memlekettik akademııalyq Úlken teatr sahnasynda alǵash ret kórsetildi.
Premerany QR Mádenıet jáne aqparat mınıstri Aıda Balaeva tamashalady. Sondaı-aq qurmetti qonaqtar retinde Ortalyq Azııa elderi mádenıet mınıstrlikteriniń basshylary men Ázerbaıjannyń Mádenıet mınıstri shaqyryldy.
Opera – bılik, taǵdyr jáne dástúrli ómir salty men keleshek ózgerister arasyndaǵy tańdaýdy tereń ashyp kórsetetin dramalyq týyndy.
Hamıt Shańǵalıevtiń mýzykasy rejısser Davıde Lıvermoreniń kórkemdik sheshimimen úılese otyryp, kórermendi Altyn Orda dáýirine tolyqtaı boılatatyn áserli atmosfera jasaıdy. Kórermen Altyn Orda tarıhyndaǵy oqıǵalar aıasynda órbıtin adamdyq tragedııalardy kózben kórip, sol kezeńniń rýhyn tereń sezine alady. Altyn Orda – túrki halyqtarynyń tarıhynda erekshe oryn alatyn rýhanı muranyń qaınar kózi.
Operany sahnalaý jumysy halyqaralyq ǵylymı yntymaqtastyqtyń úlgisine aınaldy. Jobaǵa Qazaqstan, Reseı jáne Túrkııanyń ǵalymdary atsalysty. Altyn Ordany zertteý ortalyǵynyń jetekshisi Ilnýr Mırgalıev, Ystanbuldaǵy Marmara ýnıversıtetiniń professory Ilıas Kemaloǵlý jáne tarıh ǵylymdarynyń kandıdaty Nurlan Atyǵaev. Maraltaı Ybyraev jazǵan opera lıbrettosy dramatýrg Almas Núsiptiń pesasy negizinde ázirlengen.
Qoıylym rejısseri Davıde Lıvermore – álemdik opera óneriniń moıyndalǵan sheberi, talaı ańyzǵa aınalǵan ánshilermen jáne álemniń jetekshi teatrlarymen jumys istegen tulǵa. Onyń qoıylymdary La Skala, Rım operasy, Týrındegi Teatro Redjıo jáne Genýıadaǵy Karlo Felıche teatrlarynda sahnalanǵan. Metrdiń jobaǵa qatysýy operany halyqaralyq deńgeıge kóterdi.
Mýzykalyq jetekshi ári qoıýshy dırıjeri – Qazaqstannyń eńbek sińirgen qaıratkeri, Abaı atyndaǵy teatrdyń bas dırıjeri Nurjan Baıbosynov.
Tashkenttegi premera qazaq jáne ózbek mádenıeti men tarıhynyń tereń úndestigin pash etken shyǵarmashylyq dıalogqa aınaldy. Bul sıntez eki halyqtyń myzǵymas ortaq tarıhı jadyn, rýhanı jaqyndyǵyn aıshyqtaǵan ózindik «óner kópirin» qalyptastyrdy.
Buǵan deıin opera Almaty, Ystambul jáne Qazan qalalarynda sahnalanyp, kórermenniń zor qyzyǵýshylyǵy men ystyq yqylasyna ıe bolǵan edi.
Aıta keteıik, opera ánshisi Maıra Muhamedqyzy Parıjde jeke kontsertin ótkizdi.