Ózbekstanda halyqaralyq aqyndar aıtysy ótti
Ózbekstan astanasynda keıingi 7 jylda birinshi ret halyqaralyq aqyndar aıtysy ótti, dep habarlaıdy Kazinform agenttiginiń menshikti tilshisi.
Jyr dodasy jergilikti qazaq mádenı ortalyǵynyń qoldaýymen uıymdastyryldy. Aıtysqa Qazaqstan, Qyrǵyzstan jáne Ózbekstannan barlyǵy 10 aqyn qatysty.
«Aıtys joǵary deńgeıde ótti. Bárine raqmet! Jańa jyl bárimizge tabys ákelsin. Elimiz, jurtymyz tynysh bolsyn!», - dedi aıtys tamashalaýǵa kelgen Tashkent qalasynyń turǵyny Sanabat Saparbekova.
Aqyndar aıtysy 60 jyldan beri jergilikti telearna efırinen kórsetilip kele jatqan «Zamandas-Dıdar» baǵdarlamasynyń mereıtoıyna oraılastyryldy. Shyǵarmashylyq ujym Ózbekstannyń túkpir-túkpirin aralap, qandastardyń tynys-tirshiligin baıandaıdy.
«Kórshi qonǵan aýyl adamdaryn erekshe syılaǵan halyqpyz. Sol ıgi dástúrdiń jalǵasyna taǵy kýá boldy. Qazaqstan, Qyrǵyzstannyń óner ıeleri Ózbekstannyń ónerpazdarymen birge dostasyp, bir-birlerin qoldap, osy «Zamandas-Dıdardy» jyrlap jatyr. Búgingi kúni Qazaqstan men Ózbekstannyń arasyndaǵy jetistiktiń bári syılastyqtyń arqasy», - dep málim etti «Zamandas-Dıdar» baǵdarlamasynyń aǵa redaktory Anar Nálibaeva.
Jyr báıgesi 4 saǵatqa sozyldy. Sheshýshi synda qazaqstandyq Nurlan Esenqulov pen ózbekstandyq qandas Talǵat Orynbekov kezdesip, N.Esenqulov basym tústi. Qyrǵyzstan jáne Qaraqalpaqstan atynan synǵa túskender de júlde enshiledi.
Aıta keteıik, jalpy sany 10 aqyn qatysqan aıtystyń bas júldesine 10 mln sým (400 myń teńge) tigildi, al jalpy júlde qory 1 mln teńgege jýyqtady.
