Ózbekstanda endi jappaı tártipsizdikterdi qarjylandyrǵandar jazalanady

TAShKENT. KAZINFORM — Ózbekstanda endi jappaı tártipsizdikterge qatysqandarmen qatar, ony uıymdastyrýǵa tyrysqandar men qarjylaı qoldaý kórsetkender jaza arqalaıdy, dep habarlaıdy Kazinform agenttiginiń menshikti tilshisi.

Qylmystyq kodekske engizilgen tıisti ózgeristerge Ózbekstan prezıdenti Shavkat Mırzıeev qol qoıdy.

Qujatqa saı, endi jappaı tártipsizdik uıymdastyrý maqsatynda arnaıy oqýdan ótken, praktıkalyq daǵdysyn ushtaǵan, qarý, jarylǵysh jáne ózge de qaýipti zattardy qoldaný ádisterin meńgergender jazalanady. Atap aıtqanda, olar 300-600 bazalyq eseptik shama (jobamen 4,5-9 mln teńge aralyǵy) mólsherinde aıyppul tóleıdi, 3 jylǵa deıingi merzimge qoǵamdyq jumysqa tartylady nemese 5-7 jylǵa bas bostandyǵynan aıyrylýy yqtımal.

Bul rette, eger josparlanyp otyrǵan jappaı tártipsizdik týraly aqparatty óz erkimen habarlaǵan top músheleri qylmystyq jaýapkershilikten bosatylady.

Sonymen qatar, mundaı jappaı tolqýlardyń saldarynan jeke nemese memlekettiń múlkine zalal kelse, azamattardyń densaýlyǵyna zııan tıse jáne quqyq qorǵaý organdary qyzmetkerlerine qarsylyq kórsetilse, onda kináliler 10 jyldan 15 jylǵa deıin bas bostandyǵynan aıyrylady.

Eske salaıyq, byltyr Ózbekstanda jasalǵan asa aýyr qylmystar sany 24 paıyzǵa ósti.

Taıaýda Ózbekstanda zańsyz baılyqqa kenelgenderge jaza engizý usynyldy.

Buǵan deıin habarlaǵanymyzdaı, byltyr Ózbekstanda jol apatynan 2 myńnan astam adam qaza tapty. Sondaı-aq, kórshiles elde jol erejesin jıi buzatyndar endi kólik basqarý quqyǵynan aıyrylady.

Munymen birge, 2024 jyly mas kúıinde kólik basqarǵan 31,3 myń ózbekstandyq ákimshilik jaýapqa tartyldy.