Ózbekstanda altyn quımalar men monetalardyń quny rekordtyq deńgeıde qymbattady

TAShKENT. KAZINFORM – Búgin Ózbekstan bankterindegi altyn quımalar men monetalardyń baǵasy qymbattap, buǵan deıin tirkelgen tarıhı kórsetkishten asyp tústi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan Ortalyq bankiniń deregine saı, qazir bir gramm altyn 915 myń sýmǵa (32 567 teńge) baǵalanyp otyr. Bul 26 naýryzdaǵy qunǵa qaraǵanda 0,9%-ǵa qymbat. Al salmaǵy 5 gramm bolatyn altyn quımanyń baǵasy 4,575 mln sýmǵa (162 myń teńge) teń.

Alaıda, qymbat metaldyń álemdik naryqtaǵy quny ótken aptamen salystyrǵanda birshama arzandady. 20 naýryzda altynnyń ýntsııasy (31,1 gramm) 2 200 dollar bolsa, búginde ol 2 180 dollardyń shamasynda.

Aıta keteıik, atalǵan qymbat metaldyń baǵasy naýryz aıynyń basynda birneshe ret rekordtyq kórsetkishke jetken bolatyn. Atap aıtqanda, bir apta ishinde 5 gramm altyn quımasy birden 200 myń sýmǵa (7 153 teńge) qymbattady, al 12 naýryzda onyń quny alǵash ret 4,5 mln sýmǵa (160 myń teńge) jetti.