Ózbekstanda Abaıdyń 180 jyldyǵy keńinen toılanyp jatyr
TAShKENT. KAZINFORM – Ózbekstanda Abaı Qunanbaıulynyń týǵanyna 180 jyl tolýyna oraı túrli mádenı jáne ádebı is-sharalar legi bastalyp ketti. Bul ıgi bastama eki el arasyndaǵy dostyq pen rýhanı yntymaqtastyqtyń jarqyn kórinisi retinde joǵary baǵalanyp otyr, dep habarlaıdy Kazinform tilshisi.
Osyndaı taǵylymdy sharalardyń biri Naýaı oblysy, Úshqudyq aýdanyna qarasty, áıgili Shámshi ánine qosqan Myńbulaq aýylyndaǵy mektepte ótti. Oqýshylar aqyn shyǵarmashylyǵyn keńinen nasıhattap, onyń ónegeli ómir jolyn tereńirek tanýǵa múmkindik aldy.
– Abaı – tek qazaq halqynyń ǵana emes, búkil túrki dúnıesiniń rýhanı shamshyraǵy. Ózbek jurtshylyǵy da ony tereń qurmetteıdi. Abaıdyń danalyq sózi, adamgershilikke úndegen ilimi – búgingi zamanmen úndesip jatyr, - dedi oblystyq mádenı ortalyq basshysy Serijan Janahmetov.
Úshqudyq aýdanyna qarasty Myńbulaq aýylynda Uly aqynnyń 180 jyldyǵyna oraı «Abaı – dana, Abaı – dara» atty jyr báıgesi ótti. Saıysqa aýdandaǵy qazaq tilinde bilim beretin bes mektepten oqýshylar qatysty.
Myńbulaqtaǵy №11 mektep dırektory Erlan Qonarbaevtyń aıtýynsha, bul bastama jas urpaqty ulttyq rýhta tárbıeleýge, Abaı ilimin nasıhattap, sóz ónerine, tereń oı men parasatqa baýlýǵa baǵyttalǵan.
– Abaı – qazaq rýhanııatynyń altyn dińgegi. Onyń árbir sózi – ómirlik taǵylym. Balalardyń aqyn murasyn qur jattap qana qoımaı, júrekpen uǵyna bilgeni mańyzdy, - dedi mektep dırektory.
Mádenı-tanymdyq is-shara barysynda «Bala daýysy» atty án-baıqaýy da ótkizilip, Abaıdyń ánderi shyrqaldy.
Sonymen qatar aýdandyq deńgeıde fýtbol jarysy uıymdastyrylyp, 9 mektep komandalary arasynda myqtylar anyqtaldy.
Aıta keteıik, Ózbekstan mektepterinde Abaı shyǵarmalary ózbek tiline aýdarylyp, oqý baǵdarlamasyna engizilgen. Bul – jas urpaqtyń qos halyqtyń ortaq rýhanı qazynalaryn tereń uǵynýyna úlken jol ashyp otyr.
Buǵan deıin Ózbekstanda Uly Abaıdyń 180 jyldyǵy keń aýqymda atalyp ótetinin jazǵan edik.