Ózbekstanda 100 jastaǵy ardager qazaq turady
TAShKENT. KAZINFORM — Qazaqstandyq dıplomattar Ózbekstanda týyp-ósken etnıkalyq qazaq, Ekinshi Dúnıejúzilik soǵys ardageri Bekseıit Baımyrzaevty Jeńistiń 80 jyldyǵymen quttyqtady, dep habarlaıdy Kazinform agenttiginiń menshikti tilshisi.
Bekseıit Baımyrzaev 1924 jyly 10 mamyrda Tashkent oblysyna qarasty Joǵary Shyrshyq aýdanynda dúnıege kelgen. Aýyl mektebin támamdap, 1941 jyly pedagogıkalyq tehnıkýmǵa oqýǵa túsken bozbala araǵa bir jyl salyp maıdanǵa attanady.
Ol ekinshi Ýkraına frontynyń quramynda soǵysqa aralasyp, 80 jyl buryn Jeńis kúnin Praga qalasynda qarsy aldy. Keıin japon áskerine qarsy urysqa qatysyp, 1947 jylǵa deıin serjant sheninde qyzmet etti. «Erligi úshin», «Qyzyl juldyz» medali, «Uly Otan soǵysyndaǵy jeńisi úshin» ekinshi dárejeli ordenderimen marapattalǵan.
Soǵystan oralǵannan soń Bekseıit Baımyrzaev pedagogıkalyq tehnıkýmdaǵy oqýyn aıaqtap, 1987 jylǵa deıin bilim berý salasynda qyzmet etti. Qajyrly eńbegi baǵalanyp, «Halyq aǵartý isiniń ozaty», «Qurmet belgisi», «Eńbek ardageri» medaldarymen marapattaldy.
10 mamyrda 101 jasqa aıaq basqaly otyrǵan Bekseıit Baımyrzaev áli de tyń. Kúndelikti serýenge shyǵyp, aýyl aqsaqaldarymen áńgime-dúken qurady.
Ardager Uly Jeńistiń 80 jyldyǵy jáne týǵan kúni qarsańynda quttyqtaı kelgen Qazaqstan elshiliginiń qyzmetkerlerine alǵys bildirip, batasyn berdi.
— Kelip, qurmet kórsetkenderińe shyn júrekten alǵys aıtamyn. Soǵys bolmasyn! Óskeleń urpaq beıbit kúnde ómir súrsin! Ardagerlerdiń erligin umytpaı, olarǵa iltıpat kórsetý — kelesi býynnyń týra jolda kele jatqanyn aıǵaqtaıdy. Men kópti kórgen qarııa retinde aıtarym: Adamǵa jamandyq jasaýdan aýlaq bolyńdar! Jaqsylyq pen izgilikke umtylǵan janǵa jasaǵan amaldary túbinde oralady, — dedi Bekseıit Baımyrzaev.
Búginde ardager 4 perzentinen 9 nemere men 10-nan asa shóbere súıdi. Bekseıit Baımyrzaev qazir Tashkent oblysyndaǵy Joǵary Shyrshyq aýdanynda turyp jatyr.
Eske salaıyq, búgingi tańda Ózbekstanda Ekinshi Dúnıejúzilik soǵystyń 82 ardageri turady. Olardyń eń úlkeni — 114 jasta. Prezıdent Shavkat Mırzıeevtiń jarlyǵymen maıdangerlerge «Jeńistiń 80 jyldyǵy» medali berilip, 10 myń dollar aqsha tabystaldy.