Ózbekstan úshin qazaq tiliniń latyn grafıkasyna kóshkeni mańyzdy

TAShKENT. QazAqparat - Latyn grafıkasy negizindegi jańa qazaq álipbıi Qazaqstan úshin de, Ózbekstan úshin de mańyzdy bolmaq. Bul týraly Ózbekstan ǵylym akademııasynyń vıtse-prezıdenti Bahrom Abdýhalımov málim etti, dep habarlaıdy «QazAqparat» HAA menshikti tilshisi.

«Latyn grafıkasyndaǵy álipbı árdaıym Ortalyq Azııada qoldanylyp keledi jáne negizgi bolyp sanalǵan. Ózbekstan latyn grafıkasyn shırek ǵasyr boı qoldanyp keledi, sondyqtan belgili bir deńgeıde tájirıbe jınaqtady. Bul úderistiń ońaı emes ekendigin barlyǵymyz túsinemiz jáne ony qoldanysqa engizý úshin biraz ýaqyt kerek. Alaıda, latyn grafıkasyndaǵy alfavıt Qazaqstan men Ózbekstan úshin óte mańyzdy, sebebi bizdiń tarıhymyzdy onsyz elestetý múmkin emes. Sebebi, osy latyn grafıkasymen óz ýaqytynda kóptegen kitaptar jazylyp, arhıvtik qujattar toltyrylǵan», - dep atap ótti Bahrom Abdýhalımov Ózbekstandaǵy QR Tótenshe jáne Ókiletti elshisi Erik Ótembaevpen kezdesý barysynda.

Ǵalymnyń aıtýynsha, Ózbekstanda jańa ózbek álipbıin qoldanyp júrgen jas urpaq ósken jáne sáıkesinshe, ÓR ǵylym akademııasy qazaqstandyq áriptesterimen latyn grafıkasyna ótý boıynsha jumys tájirıbesimen bólisýge daıyn.

«Bizde latyn grafıkasyna aýysý protsesi tolyqtaı aıaqtalǵan joq, alaıda qazaqstandyq sarapshylarmen tájirıbe almasýǵa daıynbyz», - dep túıindedi ol.