Ózbekstan «Transkaspıı halyqaralyq kólik baǵyty» jobasyna kirýi múmkin

TAShKENT. QazAqparat - Tashkentte «Transkaspıı halyqaralyq kólik baǵyty jáne Qazaqstannyń teńiz porty» taqyrybynda dóńgelek ústel ótti, dep habarlaıdy «QazAqparat» HAA-nyń Ózbekstandaǵy tilshisi.

Dóńgelek ústelde «Transkaspıı halyqaralyq kólik baǵytyn» (THKB) damytý jáne tanymaldyǵyn arttyrý, Qazaqstan men jobaǵa qatysýshy elderdiń teńiz ınfraqurylymynyń múmkindikterin tanystyrý máseleleri qaraldy.

Jıyn barysynda Qazaqstandyq baıandamashylar júkterdiń úzdiksiz aǵynyn tartý maqsatynda iri kólemdegi jáne perspektıvaly tranzıttik tasymaldarǵa qyzmet kórsetý boıynsha Aqtaý jáne Quryq porttarynyń múmkindikterin tanystyrdy.

Budan basqa, qazaqstandyq tarap QR-daǵy paromdy jáne qurǵaq júkterdi damytý men teńiz porttaryn ulǵaıtý boıynsha júrgizilip jatqan jumystardyń barysy týraly habarlady.

Sonymen qatar, Qazaqstan temir joly  ókilderi THKB-nyń jobasyna ózbekstandyq áriptesterin tartý aıasynda ÓR kompanııalarymen temirjol baǵyttary boıynsha tasymaldaý talaptary men júkterdi jetkizý merzimderin talqylady.

Eske sala keteıik, Ózbekstan Prezıdentiniń Qazaqstanǵa jasaǵan sapary aıasynda 1 mlrd dollar somasynda sharttar jasalǵan bolatyn.