Ózbekstan Taıaý Shyǵystaǵy shıeleniske qatysty málimdeme jasady

TAShKENT. KAZINFORM – Ózbekstannyń Syrtqy ister mınıstrligi Taıaý Shyǵystaǵy jaǵdaıdyń shıelenise túskenine alańdaýshylyq bildirip, resmı málimdeme jasady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

«Ózbek tarapy barlyq taraptardy ustamdylyq tanytýǵa, odan ári áskerı is-qımyldardan bas tartýǵa, sondaı-aq qaqtyǵysty saıası retteý úshin tez arada barlyq múmkin sharalardy qabyldaýǵa shaqyrady. Bul aımaqtaǵy shıelenistiń artýy asa aýyr zardaptarǵa jáne iri áskerı qaqtyǵystarǵa ákelýi múmkin dep sanaımyz», - delingen Ózbekstan Syrtqy ister mınıstrliginiń málimdemesinde.

Buǵan deıin QR Syrtqy ister mınıstrligi de Taıaý Shyǵystaǵy ahýalǵa qatysty málimdeme jasap, taraptar arasyndaǵy kelispeýshilikti tek saıası-dıplomatııalyq jolmen sheshýge úndegen edi.

Eske salaıyq, senbi kúni keshke Iran óz aýmaǵynan Izraılge qaraı soqqy jasaýǵa arnalǵan drondar men zymyrandardyń úlken tolqynyn ushyrdy, bul Islam Respýblıkasynyń evreı memleketine alǵash ret tikeleı shabýyl jasaýy.