Ózbekstan Taıaý Shyǵystaǵy qaqtyǵysty kelissóz arqyly sheshýge shaqyrdy

TAShKENT. KAZINFORM – Ózbek tarapy Taıaý Shyǵystaǵy jaǵdaıdyń shıelenisýine alańdaýly, dep habarlaıdy Kazinform agenttiginiń menshikti tilshisi.

- Taıaý Shyǵystaǵy jaǵdaıdyń kúrdelene túsýi bizdi asa alańdatyp otyr. Tıisinshe, Ózbekstan ózara kelissóz arqyly shıelenisti beıbit retteýge shaqyrady, - delingen Syrtqy ister mınıstrliginiń málimdemesinde.

Sondaı-aq, vedomstvo ózbekstandyqtardy Izraıl men Iranǵa barmaýǵa shaqyrdy. Al atalǵan elderdiń aýmaǵynda júrgenderge qaýipsiz aımaqtarǵa kóshý usynyldy.

- Qaýipsizdikti qamtamasyz etý maqsatynda barlyq qajetti sharalar qolǵa alyndy. Azamattarymyzdyń abaı bolǵany jáne resmı habarlamalardy muqııat qadaǵalap otyrǵany oryndy, - dep málim etti Ózbekstan SІM baspasóz hatshysy Ahror Býrhanov.

Eske salaıyq, taıaýda Irannan 30-dan astam ózbekstandyq evakýatsııalandy.

Sonymen qatar jaqynda Ózbekstan prezıdenti Shavkat Mırzıeev Taıaý Shyǵystaǵy jaǵdaı óńirdegi saýdaǵa teris áser etýi yqtımal ekenin málim etti.