Ózbekstan Syrdarııa basseıninde qazba baılyqtaryn óndirýge moratorıı engizedi
TAShKENT. KAZINFORM – Ózbekstanda Syrdarııa ózeniniń basseıninde ken materıaly bolyp eseptelmeıtin qazba baılyqtaryn óndirýge merzimsiz moratorıı engiziledi. Tıisti jarlyqa 11 naýryz kúni Ózbekstan prezıdenti Shavkat Mırzıeev qol qoıdy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstannyń Ádilet mınıstrliginen málim etkendeı, bıyl 1 mamyrdan bastap Syrdarııa ózeniniń arnasynda ken materıaly bolyp sanalmaıtyn qazba baılyqtaryn (qıyrshyq tas, qurylysqa qajetti qum, keramzıt jáne t.b – avt.) óndirýge moratorıı engiziledi. Buǵan qosa, olardy zańsyz óndirý nátıjesinde qorshaǵan ortaǵa zalal keltirgenderge qatysty qoldanylatyn jaza kúsheıedi.
Vedomstvo aqparatyna saı, Syrdarııa ózeniniń jaǵalaýyndaǵy lastanǵan jerlerdi qalpyna keltirý boıynsha jumys júrgiziledi.
Eske sala ketsek, Syrdarııa ózeni basseınindegi sýdyń sapasyn baqylaý, lastanýdyń sebepterin anyqtaý jáne olardyń áserin azaıtý jónindegi byltyr Astanada Qazaqstan-Ózbekstan birlesken jumys tobynyń otyrysynda talqylanǵan edi.
