Ózbekstan men Mońǵolııa saýda-sattyq kólemin 5-10 ese ulǵaıtýǵa nıetti
TAShKENT. KAZINFORM – Mońǵolııa prezıdenti Ýhnaagıın Hýrelsýhtyń Ózbekstanǵa jasaǵan memlekettik sapary barysynda 14 qujatqa qol qoıyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ýhnaagıın Hýrelsýhtyń Ózbekstanǵa sapary «Kóksaraı» rezıdentsııasyndaǵy resmı kútip alý saltanatynan bastaldy.
Ózbekstan prezıdenti Shavkat Mırzıeev mártebeli meımandy jyly qarsy aldy. Memlekettik ánurandar shyrqaldy, artynsha eki el basshylary resmı delegatsııa múshelerimen amandasty.
Sýretke túsý rásiminen soń memleket basshylary kelissóz ótkizdi.
Onyń barysynda elder arasyndaǵy ózara tıimdi yntymaqtastyqty odan ári keńeıtý máseleleri qaraldy. Atap aıtqanda, Mońǵolııa men Ózbekstan aldaǵy jyldary ózara taýar aınalymyn 5-10 ese ulǵaıtýǵa múddeli. Ol úshin suranysqa ıe ónimderdiń eksporty men ımportyn arttyrý josparlanyp otyr.
Osy maqsatta eki el úkimetine taýar aınalymyn ulǵaıtý boıynsha birlesken jumys tobyn qurý, Ulan-Batyr men Tashkentte resmı saýda úılerin ashý jáne preferentsııalyq saýda týraly kelisimniń jobasyn daıyndaý tapsyryldy.
Sondaı-aq, Shavkat Mırzıeev ónerkásiptik kooperatsııanyń orta merzimdi baǵdarlamasyn qabyldaý týraly bastama kóterdi. Bul rette taraptar eń aldymen geologııalyq barlaý, shıkizatty ıgerý jáne qaıta óńdeý salasyndaǵy yntymaqtastyqty ilgeriletýge múddeli.
Buǵan qosa prezıdentter «Halal» standartyna saı keletin et ónimderin shyǵarý boıynsha óndiristik klaster qurý bastamasyna qoldaý bildirdi. Munymen birge daıyn ónim shyǵarý, jún men bylǵaryny tereń óńdeý baǵyttarynda mańyzdy jobalar usynyldy. Ol úshin eki eldiń ǵylymı-zertteý ınstıtýttary arasyndaǵy baılanysty damytý qajet ekendigi atap ótildi.
Shavkat Mırzıeev pen Ýhnaagıın Hýrelsýh eń tıimdi ári qysqa kólik dálizderine, sonyń ishinde Qyrǵyzstan men Qytaı arqyly ótetin marshrýttarǵa birlesken taldaý júrgizýdi usyndy.
Ótken kelissóz qorytyndysy boıynsha eki el basshylary birlesken málimdemege jáne memleketaralyq qatynas pen yntymaqtastyq týraly 14 qujatqa qol qoıdy.
Odan keıin Shavkat Mırzıeev pen Ýhnaagıın Hýrelsýh eki eldiń iri kásipkerlerimen kezdesý ótkizdi, mártebeli meımandar alleıasyna aǵash otyrǵyzdy jáne Tashkenttegi Tehnoparktiń jumysymen tanysty.
Endi Mońǵolııa prezıdenti Hıýa qalasyna baryp, ózbek halqynyń baı mádenı-tarıhı murasymen tanysady. Onyń Ózbekstanǵa memlekettik sapary 26 maýsymǵa deıin jalǵasady.
Eske salsaq, Ýhnaagıın Hýrelsýh keıingi ret Ózbekstanǵa 2022 jyly qyrkúıekte ShYU memleket basshylarynyń keńesine qatysý úshin kelgen bolatyn.
