Ózbekstan men Qytaı arasyndaǵy áýe tasymaly aptasyna 100 reıske deıin ulǵaıady

TAShKENT. KAZINFORM – Ózbekstan men Qytaı arasyndaǵy áýe tasymalynyń sanyn aptasyna 100 reıske deıin arttyrý josparlanyp otyr, dep habarlaıdy Kazinform agenttiginiń menshikti tilshisi Álıhan Asqar.

Ózbekstan Kólik mınıstrliginiń málimetinshe, tıisti kelisimge Qytaıdyń avıatsııalyq ákimshiligimen birlese qol qoıylǵan.

«Kelisim taraptar arasynda áýe tasymalyn aptasyna 100-ge deıin ulǵaıtýdy, eki eldiń kez kelgen qalalaryna ushý múmkindigin usyný úshin Ózbekstan men Qytaı áýekompanııalarynyń ushý geografııasyn keńeıtýdi (qazirgi ýaqytta ushý úshin 7 qala belgilengen) kózdeıdi», - dep málim etti Kólik mınıstrliginen.

Vedomstvo aqparatyna saı, atalǵan kelisim bıyl sáýir aıynda ótetin qosymsha kezdesýdiń qorytyndysy boıynsha kúshine enedi.