Ózbekstan men Qyrǵyzstan shekarasynda 2 ótkizý beketi ashyldy
TAShKENT. KAZINFORM – Ózbekstan men Qyrǵyzstan shekarasynda eki ótkizý beketi ashyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Keden komıtetiniń málimetinshe, Namanǵan oblysynyń Qyrǵyzstanmen shektesetin Ýchkýrgan aýdanynda «Ýchkýrgan» keden beketiniń ashylý saltanaty ótti.
Ótkizý beketi kúnine orta eseppen 10 myń adamdy qabyldaýǵa qaýqarly. Buǵan qosa, ol 500-den astam júk, 300-den asa jeńil kólikti ótkize alady.
Ekinshi ótkizý pýnkti Andıjan oblysynda ornalasqan. «Qarasý» beketi araǵa 14 jyl salyp, qaıta ashylyp otyr. Ol kúnine 12 myńnan astam adamdy qabyldamaq.
Vedomstvodan atap ótkendeı, eki ótkizý pýnktinde de azamattarǵa barlyq jaǵdaı jasalǵan jáne kedendik baqylaý protsesteri jedeldetilgen rejımde júrgiziledi.
