Ózbekstan men Belarýs ózara taýar aınalymyn 1 mlrd dollarǵa jetkizbek

TAShKENT.KAZINFORM – Ózbekstan basshysy Shavkat Mırzıeev pen Belarýs prezıdenti Aleksandr Lýkashenko Tashkentte ótken kelissóz barysynda eki el arasyndaǵy ekonomıkalyq yntymaqtastyqtyń basym baǵyttaryn talqylady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan prezıdentiniń baspasóz qyzmetinen habarlaǵandaı, byltyr eki el arasyndaǵy saýda-sattyq 15%-ǵa ósken.

«Qos el úkimetiniń aldyna osy kórsetkishti aldaǵy jyldary 1 mlrddollardan asyrý mindeti qoıyldy. Osy maqsatta birlesken syrtqy saýda kompanııasyn qurý, eksport pen ımportty qoldaý tetikterin jáne taýarlardy sertıfıkattaýdyń elektrondyq júıesin engizý týraly ýaǵdalastyqqa qol jetkizildi», - dep málim etti Ózbekstan basshysynyń baspasóz qyzmetinen.

Sonymen qatar, taraptar júk tasymaly úshin ózara qolaıly jaǵdaı jasaýǵa, ońtústik Azııanyń tıimdi naryqtaryna shyǵýǵa múmkindik beretin mýltımodaldy dálizderdi utymdy paıdalanýǵa kelisti.

Buǵan qosa, kooperatsııalyq baılanystardy damytýǵa erekshe kóńil bólinedi. Sońǵy jyldary birlesken kásiporyndar sany 4 esege ósti. Kelissóz barysynda memleket basshylary kooperatsııanyń aýyl sharýashylyǵy, jeńil, tamaq jáne elektrotehnıka ónerkásibi, farmatsevtıka men kommýnıkatsııa sııaqty basym baǵyttaryn atap ótti.

Eki el basshylary mádenı-gýmanıtarlyq yntymaqtastyqty nyǵaıta túsýge kelisti. Tıisinshe joǵary jáne kásiptik bilim berý, densaýlyq saqtaý, mádenıet, sport pen týrızm salasyndaǵy áriptestikti damytý baǵdarlamalary ázirlenedi.

Eske salaıyq, buǵan deıin Ózbekstan basshysy Shavkat Mırzıeevtiń shaqyrýymen Belarýs prezıdenti Aleksandr Lýkashenko Tashkentke resmı saparmen kelgenin habarlap edik.