Ózbekstan kómir óndirisin 22 paıyzǵa arttyrady
TAShKENT. KAZINFORM — Ózbekstan halyqtyń, áleýmettik salanyń jáne ónerkásiptiń qajettiligin eskere otyryp, kómir óndirisin 22%-ǵa arttyrýy tıis. Geologııa máseleleri talqylanǵan keńeste el prezıdenti Shavkat Mırzıeev jaýapty organdarǵa osyndaı tapsyrma júktedi.
Ózbekstan basshysynyń baspasóz qyzmetinen málim etkendeı, geologııa salasyna jyl saıyn 1 trln sým (36,5 mlrd teńge) bólinip, nátıjesinde 31 myń sharshy shaqyrym jańa ýchaskege geologııalyq barlaý júrgizilgen.
Sondaı-aq, bul baǵytta 1,7 mlrd dollarǵa baǵalanǵan ınvestıtsııalyq jobalar iske asyp jatyr.
Jıyn barysynda Shavkat Mırzıeev salaǵa sheteldik tehnologııa men ınvestıtsııa tartýdy jalǵastyrý boıynsha tapsyrma berdi.
Onyń arqasynda geologııalyq barlaý men óndiris tıimdiligi arta túspek.
Statıstıka agenttiginiń málimetinshe, byltyr 11 aıda Ózbekstanda kómir óndirý kólemi 19,1 paıyzǵa ósip, 5,73 mln tonnaǵa teńeldi.
Sonymen qatar, 2023 jyldyń qorytyndysy boıynsha Qazaqstannan Ózbekstanǵa jetkizilgen qatty otyn 1,4 mln tonnaǵa artyp, 3,1 mln-ǵa jetti.
Al qyrǵyz kómiriniń ımporty 10 aıda 2 esege, ıaǵnı 900 myń tonnaǵa deıin ósti.
Eske sala keteıik, buǵan deıin Ózbekstan Ekologııa mınıstrligi Tashkenttegi aýanyń lastanýyna aǵashtardy zańsyz kesý, kólikter bóletin zııandy gazdar jáne kómir men mazýt tútini sebep ekenin málimdegen edi.
Osyǵan baılanysty vedomstvo kásiporyndar men jylý ortalyqtarynda kómir men mazýtty paıdalanýǵa tyıym salýdy usyndy.
