Ózbekstan Qazaqstan spýtnıkteriniń qyzmetin tutynady

ASTANA. QazAqparat - «Qazaqstan Ǵarysh Sapary» Ulttyq kompanııasy» AQ delegatsııasy Ózbekstanǵa saparmen baryp, kórshi elmen ǵarysh salasyndaǵy yntymaqtastyq týraly qujatqa qol qoıyp qaıtty, dep habarlaıdy «QazAqparat» HAA tilshisi.

Qazaqstan Respýblıkasynyń Jerdi qashyqtyqtan zondtaý ǵaryshtyq júıesiniń derekterin Ózbekstan Respýblıkasynyń múddeleri úshin paıdalaný salasyndaǵy ózara yntymaqtastyq, Ózbekstan Respýblıkasynyń spýtnıktik geodezııa júıesi jelisin qurý, memlekettik jáne jergilikti atqarýshy organdar úshin geoportaldar ázirleý týraly memorandýmǵa «QǴS» UK» AQ vıtse-prezıdenti Aıdyn Aıymbetov jáne Ózbekstan Respýblıkasynyń jer resýrstary, geodezııa, kartografııa jáne memlekettik kadastr jónindegi memlekettik komıtetiniń ókili qol qoıdy.

«Kezdesýde Ózbekstan Respýblıkasynyń aýmaqtaryn ǵaryshtan monıtorıngıileýdi «KAZAKH EXPORT» AQ arqyly qarjylandyrý máselelerin, sondaı-aq Ózbekstan Respýblıkasynda jerústi qabyldaý stansasyn qurý múmkindikteri jáne jalpy Jol kartasy jobasyn talqyladyq», - deıdi A. Aıymbetov.

Onyń aıtýynsha, Ózbekstan tarapyna Qazaqstannyń KazSeoSat - MR ǵaryshtyq apparatyn qurýǵa qatysý usynyldy. Yntymaqtastyqtyń negizgi baǵyttary, atap aıtqanda, Jerdi qashyqtyqtan zondtaý jáne aeroǵaryshtyq yntymaqtastyqty damytý boıynsha turaqty baılanysty nyǵaıtý kelisildi.

Eske sala keteıik, Qazaqstanda 2015 jyldan beri Jerdi qashyqtyqtan zondtaý ǵaryshtyq júıesi tabysty qyzmet júrgizip keledi. Ol keńistikti beıneleýi joǵary (1 metr) jáne orta (6,5 metr) spýtnıkterden, sondaı-aq Astanadaǵy basqarý jáne derekterdi óńdeý kesheninen turady.

Osyǵan deıin Qazaqstandaǵy qylmyspen kúreske spýtnıkter jumyldyrylatyny habarlanǵan edi.