Ózbekstan halqyna aýa lastanatyny eskertiletin bolady
ASTANA. KAZINFORM – Ózbekstan 1 naýryzdan bastap shańdy daýyl turyp, atmosferalyq aýadaǵy usaq dıspersti bólshekter belgilengen normasynan asyp ketken jaǵdaıda halyqty habardar etetin bolady, dep jazady Uza.
Bul Ózbekstan prezıdenti Shavkat Mırzıeevtiń 2024 jyldyń 21 aqpanyndaǵy «Ózbekstan-2030» Strategııasyn júzege asyrýdyń memlekettik baǵdarlamasyn bekitken jarlyǵynda kózdelgen.
Osy kúnnen bastap júrek-qan tamyrlary jáne tynys alý joldary aýrýlarymen aýyratyn adamdarǵa, sondaı-aq densaýlyǵy aýanyń lastanýyna sezimtaldyǵy joǵary basqa da azamattarǵa qajetti profılaktıkalyq is-sharalar týraly júıeli túrde aqparat berilýi tıis.
Jarlyqta, sondaı-aq, 1 naýryzdan bastap 500 sharshy metr jáne odan da kóp qurylys alańdarynda shań men qum bólshekteriniń aýaǵa kóterilýine jol bermeý boıynsha mindetti talaptar engizý kózdelgen.
