Ózbekstan balabaqshalarynda 60-tan astam búldirshin astan ýlandy

TAShKENT. KAZINFORM – Ferǵana qalasyndaǵy úsh memlekettik balabaqshada astan ýlanǵan 62 búldirshin aýrýhanaǵa jatqyzyldy, dep habarlaıdy Kazinform agenttiginiń Tashkenttegi menshikti tilshisi.

Buǵan deıin áleýmettik jelilerde Ferǵanadaǵy balabaqsha tárbıelenýshileriniń ýlanǵany týraly aqparat taraǵan bolatyn. Ata-analarynyń aıtýynsha, 20 aqpanda balalardyń densaýlyq jaǵdaılary nasharlap, úıge oralǵan.

Oblystyq densaýlyq saqtaý basqarmasynyń málimetinshe, 21 aqpan kúni keshke qaraı Ferǵana oblystyq juqpaly aýrýlar aýrýhanasyna №2, №58 jáne №61 balabaqshanyń tárbıelenýshileri tústi. Balalarda ish aýyrý, dıareıa jáne júrek aıný sııaqty belgiler baıqalǵan.

Dárigerlerdiń tekserýinen keıin naýqastarǵa «Alımentarly etıologııanyń jedel dıareıasy» dıagnozy qoıylǵan. Qazirgi ýaqytta 62 bala em alyp jatyr, olardyń densaýlyq jaǵdaıy qalypty.

- Sanıtarlyq-epıdemıologııalyq salaýattylyq jáne qoǵamdyq densaýlyq saqtaý basqarmasynyń mamandary balabaqshalardyń ashanalaryna jáne tamaq jetkizetin kásiporyndarǵa tekserýler júrgizedi. Balalar tutynatyn taǵamdardyń zerthanalyq synamasy alynyp, taldaý jasalady, - dep málim etti basqarmadan.

Qosa ketsek, byltyr qyrkúıekte Ózbekstan balabaqshalarynda 2 myńǵa jýyq búldirshin astan ýlanyp, olardyń 960-tan astamy aýrýhanaǵa jatqyzylǵan edi. Keıin Bas prokýratýra arnaıy jumys tobyn quryp, jaǵdaıdyń mán-jaıyn anyqtady.