Ózbekstan aqyly negizde shekaradan kezeksiz ótý tártibin engizedi
TAShKENT. KAZINFORM – Ózbekstannyń Mınıstrler kabıneti azamattardyń shekaradan ótý tártibin jeńildetýge baǵyttalǵan qaýlyny qabyldady, dep habarlaıdy Kazinform agenttiginiń menshikti tilshisi.
Qujatqa sáıkes, shekaradan ótetin azamattarǵa aqyly negizde kezeksiz ótý qyzmeti engiziledi.
Ol úshin jeke nemese zańdy tulǵalar ótkizý pýnktine kelgenge deıin Keden komıtetiniń resmı saıty arqyly ótinish berýi tıis. Mundaı qyzmettiń baǵasy 56 250 sým (shamamen 2 250 teńge). Tıisinshe, ótinish negizinde alynǵan QR-kody bar elektrondyq talondy kedenshilerge kórsetip, shekaradan kezeksiz ótýge bolady.
Qaýlyda jazylǵandaı, qyzmetti paıdalanýshylar arnaıy bólingen aımaqtarda (dálizderde, VIP-oryndar) kezekten tys kedendik baqylaýdan ótedi. Qalǵan adamdarǵa jalpy kezek tártibimen qyzmet kórsetiledi.
Mundaı tártip qazaq-ózbek shekarasyndaǵy 4 ótkizý beketine engiziledi.
Eske salaıyq, Ózbekstan Qazaqstan men Tájikstan shekarasynan ID-kartamen ótý tártibin engizýdi josparlap otyr. Byltyr qarashada Olıı Majlıstiń Zań shyǵarý palatasy depýtattarynyń aldynda sóz sóılegen Ózbekstan prezıdenti Shavkat Mırzıeev osylaı málim etti.
Sonymen qatar, Ózbekstan men Ázerbaıjan shekaradan jeke kýálikpen ótý tártibin engizýi múmkin.