Óz mamandyǵyńa shyndap berilseń, qıyndyǵyna da tóselip ketesiń – Aınur Iqsanova
-Aınur Tólegenqyzy, jerge ornalastyrý mamandyǵyn kóbine er adamdardyń meńgeretini belgili. Osyǵan qalaı keldiń, sony áńgimelep berseń?
-Meniń ómirimniń ózgelerden kóp ereksheligi joq. Qarapaıym aýyl qyzymyn. 1985 jyly 12 qarasha kúni Bókeı ordasy aýdany Bısen aýylynda dúnıege keldim. 2003 jyly Jánibek aýylyndaǵy T.Jarokov atyndaǵy orta mektepti támamdap, eseıý jolyna tústim.
Ákem ómirden erte ketti de, bar qıyndyq úsh qyzymen qalǵan anamnyń ıyǵyna tústi. Meni kishkentaıymnan pysyq, ótkir minezdi, esh nárseden qaımyqpaıtyn qyz etip ósirdi dep oılaımyn. Ol kez qansha jaqsy bolǵanymen, joqshylyq ta, tarshylyq ta kezdespeı qalǵan joq. Bizderge joqtyq pen tarshylyqty kórsetpeımin dep, anamyz er adamnyń da, áıeldiń de qyzmetin atqarǵanyn sábı bolsaq ta sezinip óstik.
Aldymdaǵy apam men izimnen ergen sińilim maǵan qaraǵanda, minezderi birqalypty, jaıdarly, názikteý boldy. Óse kele, uldardyń jumysyn isteý meniń moınymda boldy. Qar kúreý, sý tasý, mal qaraý sııaqty jumystardy aıtqyzbaı tyndyratynbyz. Anamyz osynshama qıyndyqpen bizdi ósirip, boı jetkizdi. Qaıtsem, sol anashymdy taqqa otyrǵyzbasam da, baqqa bóleımin degen bala arman keýdemde boldy.
Sondyqtan bolar, kóbine er adamdar tańdaıtyn jerge ornalastyrý mamandyǵyn men de atqara alamyn degen oıǵa bekindim. Onyń ústine anashyma kómegim bolsyn, aqyly emes, ne de bolsa tegin oqımyn, áýeli agrokolledjde bilim alyp, sosyn eńbekke ornalasyp, joǵary oqý ornyna túsermin degen maqsat ta boldy.
Mine, osylaısha, jerge ornalastyrýshy – jer kadastry mamandyǵy boıynsha bilim alyp, 2006 jyly Jánibek aýdandyq jer kadastry fılıalyna dırektor bolyp taǵaıyndaldym. Osy jumystyń qyr-syryn Ordabek Zaınýllın degen maman úıretip, bárin túsindirdi. Eńbek jolymnyń ońaıǵa túspeıtinin sonda túsindim.
-Jerge ornalastyrýshynyń ózindik qıyndyǵy da jetkilikti bolar?
-Iá, tańmen erte turyp, aýyldardy aralap, jer ólsheýge, jobalaý jumystaryn atqarýǵa týra keletin. Tapsyrys berýshiniń kóligimen 100-150 shaqyrym qashyqtyqta ornalasqan jerge baratynmyn. Alys okrýgterge jol túskende, bir emes, birneshe jerdi ólshep kelýge tyrysasyń. Joldyń aýyrlyǵyna, qystyń aıazy men jazdyń aptap ystyǵyna kónýge týra keledi. Keıde aparǵan kóligiń joldyń joqtyǵynan júre almaı qalady. Sonda kún ystyqta eki-úsh shaqyrym jaıaý júresiń. Mine, osynyń bári pysytty, odan saıyn shyńdala tústim. Sóıtip júrip eki joǵary oqý ornyn támamdap, jerge ornalastyrýshyǵa qosa zańger mamandyǵyn da meńgerdim. Qazir eńbegimniń jemisin kórip júrmin. Tárbıelep otyrǵan qyzym bar, baqyttymyn dep oılaımyn.
-Kúni búgin qandaı qyzmettesiń, ony da aıta ketseń?
-Búgingi tańda Jánibek aýdandyq tirkeý jáne jer kadastry bóliminde jerge ornalastyrý jónindegi bas maman qyzmetin atqaramyn. Aýdandyq bólimde tórt maman eńbek etedi. Bólim jer telimderine jerge ornalastyrý jumystary, tehnıkalyq qujat, memlekettik sáıkestendirý qujattary, kadastrlyq baǵalaý qunyn aıqyndaý jáne basqa qyzmetterdi atqarady. Kúnine 10-15 tapsyrys berýshi bólimniń jumysyna júginedi. Sonyń bárin ýaqtyly tyndyrý – bizdiń mindetimiz.
Munymen toqtap qalmaı, óz mamandyǵym boıynsha biliktiligimdi áli de jetildirgim keledi.
-Halyqaralyq áıelder kúnine oraı qandaı tilek bildirer ediń?
-8 naýryz – kóptegen el toılaıtyn halyqaralyq mereke. Ózim ana bolǵannan keıin barlyq álemdegi áıelderdiń uıqysy tynysh bolsa eken, ósirip otyrǵan urpaqtary baqytty bolsa eken, árkim esh ýaıymsyz, qaıǵysyz ómir súrse eken dep tileımin. Ómirge urpaq ákeletin – ana, sondyqtan analardyń tilegi qabyl bolady dep oılaımyn. Barsha anaǵa densaýlyq, eńbekteri jemisti, kórgenderi qyzyq bolsyn dep tileımin. Beıbit ómirge jetetin eshteńe joq, halqymyz aman, elimiz tynysh bolsyn!
-Áńgimeńe rahmet.