Óz mamandyǵymdy shynaıy jaqsy kóremin – qyzylordalyq TJD feldsheri
QYZYLORDA. KAZINFORM – Qyzylordalyq Jazıra Dosaeva 16 jyldan beri Qyzylorda oblystyq Tótenshe jaǵdaılar departamenti «Apattar medıtsınasy ortalyǵy» fılıalynyń feldsheri qyzmetin atqaryp keledi. Jyldyń qaı mezgilinde de tynym tappaıtyn mamandyq ıeleri tosynnan bolǵan apat kezinde alǵashqy kómekke umtylady. Qarapaıym eńbek adamy retinde eldiń alǵysyna bólenip júrgen keıipkerimiz mamandyǵy jóninde aıtyp berdi.
- Bul salany tańdaýyńyzǵa ne sebep boldy? Qyzmetińiz áıel balasyna aýyr soǵatyn mamandyqtyń biri ǵoı. Jumys barysynda qandaı jaýapkershilikti sezinesiz?
- Tótenshe jaǵdaı qyzmeti úlken jaýapkershilik pen batyldyqty talap etedi. Bul salada eńbek etý úshin adamǵa shydamdylyq, jyldamdyq pen qajyr-qaırat qajet. Dese de, bul mamandyqty tańdaǵan árbir adam óz jumysyn shynaıy súıispenshilikpen isteıtinine senimdimin.
Meniń negizgi mindetim - zardap shekken turǵyndarǵa shuǵyl medıtsınalyq kómek kórsetý. Jalpy, meniń medıtsına salasyndaǵy eńbek ótilim - 26 jyl. Osy ýaqyt aralyǵynda túrli oqıǵany kózben kórip, naýqastarǵa qoldan kelgenshe kómek kórsettim. 2018 jyldan bastap oblystyq tótenshe jaǵdaılar departamentiniń «Apattar medıtsınasy ortalyǵy fılıalynyń» feldsheri jáne psıhology bolyp qyzmet atqaryp kelemin. Eki mamandyqty qatar alyp júrgenime 16 jyldyń kólemi boldy.
Tosyn jaǵdaıǵa tap bolǵan turǵyndarǵa psıhologııalyq kómek kórsetý ońaı emes. Sol sátte ol azamatqa barynsha qoldaý bildirip, qalpyna kelýine jaǵdaı jasaýymyz tıis. Árıne, mundaı sátti eshkimniń basyna bermesin. Dese de biz kez-kelgen ýaqytta azamattarǵa qol ushyn sozamyz. Psıhologııalyq turǵyda kómek kórsetemiz.
- Eńbek jolyńyzda qandaı oqıǵalar este qaldy? Ol sátte qandaı is-áreket jasadyńyz?
- Bizdiń fılıalda 53 shtattyq birlik quramy eńbek etedi. Biz tek óńirde ǵana emes, elimizdiń basqa aımaǵynda da oryn alǵan tótenshe oqıǵalarǵa attanyp, óz mindetimizdi minsiz atqarýǵa tyrysamyz.
2020 jyly Maqtaaral aýdanynda sý tasqyny bolǵany belgili. Bul apattan sol aımaqtyń turǵyndary zardap shekti. Sol mezette jaraqat alǵan azamattarǵa alǵashqy medıtsınalyq kómek kórsetip, 36 balaǵa psıhologııalyq, art-terapııa men trenıng ótkizdim. Sol eńbegimniń nátıjesinde «ІІІ dárejeli qutqarýshy» tósbelgisimen marapattaldym. Qyzmet atqaratyn mamandyǵym qanshalyqty qıyn ári jaýapkershilik júgi aýyr bolsa da bul sala meniń ómirimniń bir bólshegi. Óz mamandyǵymdy shynaıy jaqsy kóremin.
- Qyzmet barysynda oblystan jyraq taǵy da qandaı jerlerde jumys atqardyńyzdar?
- Eńbek jolymda Batys Qazaqstan oblysynyń Qaztalov, Aqtóbe oblysynyń Hromtaý aımaqtarynda bolyp qaıttym. Qaı jerde de óz qyzmetimizdi múltiksiz oryndap, eldiń alǵysyna bólenip kelemiz.
- Oblysta bolǵan tótenshe oqıǵalar kezinde fılılal mamandary qandaı kómek kórsetti?
- Byltyr fılıaldyń shuǵyl áreket etý brıgadalary tótenshe jaǵdaı oryndaryna 280 ret shuǵyl shyǵyp, medıtsınalyq kómek kórsetti. Jyl basynan beri oqıǵa oryndarynda 37 ret qyzmet atqardyq. Kúre jol medıtsınalyq qutqarý beketiniń mamandary osyndaı 22 oqıǵa ornyna bardy.
- Ózińiz jaıly aıta ketseńiz. Alǵan bilimińiz qandaı?
- Men 1977 jyly dúúnıege keldim. 1994 jyly Qarmaqshy aýdanyndaǵy Aqjar aýylyndaǵy №28 mektepte bilim aldym 1995 jyly Qyzylorda medýchılışesine túsip, 1998 jyly «Emdeý isi» mamandyǵyn alyp shyqtym. 1998-2005 jyldary №2 emhanada, 2005-2008 jyldary №4 emhanada medbıke bolyp jumys jasady. 2008 jyldan Apattar medıtsınasy ortalyǵynyń óńirdegi fılıalynda feldsher bolyp eńbek etip kelemin. 2009 jyly «Bolashaq» ýnıversıtetine túsip, 2014 jyly «psıholog» mamany dárejesine ıe boldym.
- Áńgimeńizge raqmet.
