«Óz kásibiniń úzdigi» atty medıtsına qyzmetkerleri arasynda ótken respýblıkalyq baıqaýdyń jeńimpazdary marapattaldy
Búgin Beıbitshilik jáne kelisim saraıynda (Astana q.) jyl saıyn maýsym aıynyń úshinshi jeksenbisinde atap ótiletin Medıtsına qyzmetkerleri kúnine arnalǵan saltanatty shara ótti. Jıyn barysynda «Óz kásibiniń úzdigi» respýblıkalyq baıqaýynyń jeńimpazdary 8 atalym boıynsha baǵaly syılyqtar jáne dıplomdarmen marapattaldy. Medıtsına salasy qyzmetkerlerine belgili qazaqstandyq estrada oryndaýshylary óner kórsetti.
Saltanatty jıynǵa QR Densaýlyq saqtaý jáne áleýmettik damý Mınıstri Tamara Dúısenova, QR Parlamentiniń depýtattary, Qazaqstannyń barlyq aımaqtarynan kelgen belgili medıtsına salasynyń qyzmetkerleri men qoǵam qaıratkerleri (1300-den astam adam) qatysty.
Tamara Dúısenova elimizdegi medıtsına salasynyń qyzmetkerlerin kásibı merekemen quttyqtaı otyryp, qazaqstandyqtar men ult bolashaǵynyń densaýlyǵyn qamtamasyz etýge bar kúsh-jigerin salatyn dárigerlerdiń eńbegi ystyq yqylas pen zor alǵysqa laıyq ekenin atap aıtty.
«Qaljyraǵan tán men qasiret tóngen janǵa arasha bolar tek bir ǵana maman ıesi bar, ol - dáriger. Álemde dárigerden asqan qaıyrymdy jan, dáriger kásibinen mańyzdy mamandyq joq shyǵar. Qurmetti dárigerler men meıirgerler, aýrýhanalar men emhana qyzmetkerleri, professor-oqytýshylar, medıtsınalyq bilim berý mekemeleriniń ustazdary, sizderdi ózimniń jáne Qazaqstan halqynyń atynan kásibı merekelerińiz - Medıtsına qyzmetkeri kúnimen shyn júrekten quttyqtaımyn!
Sizder eń izgi, eń kúrdeli mamandyqtyń birin tańdadyńyzdar. Sizderdiń eńbekterińiz joǵary biliktilikti, óz isine degen adaldyqty, tózim men yqylasty talap etedi. Ár dárigerdiń eńbegi ult densaýlyǵyn qalyptastyrýǵa, otandyq densaýlyq saqtaý júıesin damytýǵa zor úles qosyp keledi.
Osyndaı jaýapty isterińiz adamdardyń densaýlyǵyn túzetip, olardyń erteńgi kúnge degen senimin arttyrady. Kez-kelgen ýaqytta kómek qolyn sozyp, adam ómirine arasha túsýge daıyn turatyn dárigerlerimiz ben orta medıtsına personalyna aıtar jaqsy sózderimiz eshqashan tolastamaıdy.
Adal atqaryp júrgen qaıyrymdy qyzmetterińizdiń arqasynda patsıentterdiń sheksiz alǵysyna bólenip, atqaryp kele jatqan qyzmetterińiz ben jetistikterińizdiń jemisin kóre berińizder!», - dedi tamara Dúısenova.
Sonymen birge, Mınıstr elimiz tarıhyndaǵy qysqa ǵana ýaqytta zamanaýı densaýlyq saqtaý ınfraqurylymy jasalyp, kadrlyq potentsıal damytylyp kele jatqanyn, salany qarjylandyrý ulǵaıtylyp otyrǵanyn atap aıtty.
«Keıingi onjyldyqta densaýlyq saqtaýǵa jumsalatyn shyǵyn tórt esege kóbeıdi. 1 000-nan astam densaýlyq saqtaý obektisi salyndy. 170 mldr-tan astam teńgege medıtsınalyq jabdyq satyp alynyp, onyń kólemi 6 esege arttyryldy. Jasalyp jatqan sharalardyń arqasynda barlyq mamandyqtar boıynsha jalpy respýblıkada, óńirlerde medıtsına kadrlarynyń tapshylyǵy tómendetildi.
Sońǵy bes jyl ishinde respýblıkamyzda qazaqstandyqtardyń ortasha ómir súrý jasy 2,8 ese ulǵaıyp, 70 jastan asty. Halyq arasyndaǵy ólim-jitim kórsetkishi 15%-ǵa, al analar ólim-jitimi - 1,9, náresteler arasyndaǵy ólim-jitim sany 1,7 esege tómendedi», - dep málimdedi Tamara Dúısenova.
Jyl sanap Qazaqstanda naýqastardy joǵary tehnologııalardy paıdalanyp emdeý sany artýda. Engizilgen Biryńǵaı ulttyq densaýlyq saqtaý júıesi búkil óńirlerde joǵary tehnologııalardy belsendi túrde damytýǵa yqpal etti. Aýyl turǵyndary úshin joǵary mamandandyrylǵan medıtsınalyq kómek qoljetimdi etildi.
Búginde Ulttyq kardıohırýrgııalyq ortalyq, Ulttyq neırohırýrgııalyq ortalyq, Ulttyq ǵylymı medıtsınalyq ortalyq sııaqty jáne basqa da zamanaýı medıtsınalyq ortalyqtardaǵy dárigerler jasaǵan qıyn otalar belesendi jumys jasaıdy. Neırohırýrgııa, travmatologııa, kardıologııa, transplantologııa salasynda kóptegen úlken jetistikterge qol jetkizildi. Týberkýlez jáne áleýmettik mańyzy bar aýrýlar boıynsha baǵdarlamalar nátıjeli iske asyrylýda.
Aldaǵy ýaqytta eldiń densaýlyq saqtaý júıesiniń qurylymy men ony uıymdastyrý prıntsıpterin aıqyndaıtyn medıtsınalyq-sanıtarııalyq alǵashqy kómekti damytýǵa erekshe kóńil bólinetin bolady.
2017 jyldan bastap áleýmettik medıtsınalyq saqtandyrý kezeń-kezeńimen engiziledi. Bul densaýlyq saqtaýdy qarjylandyrý kózderin memleket, jumys berýshi, azamattardyń qarajaty esebinen keńeıtýge múmkindik beredi jáne de júıege qatysýshylardyń densaýlyqty saqtaý úshin ortaq jaýapkershilikte bolýyn qamtamasyz etetin bolady.
«Eńbekaqy tóleýde emdeý mekemeleri basshylarynyń quqyqtary artty. Jumys istegen saǵatyna qarap aqy tóleýdiń eski modeli aýystyrylyp, sońǵy nátıjege baılanysty tólenetin boldy. Endi eńbekaqy kóbine emdeý sapasy men patsıenttiń qanaǵattaný deńgeıine qaraı tólenedi» - dep habarlady Tamara Dúısenova.
Saltanatty jıynda 8 atalym boıynsha «Kásibiniń úzdigi» respýblıkalyq baıqaýynyń jeńimpazdary marapattaldy:
«Úzdik dáriger» - Almaty qalasy I. Jıkenova atyndaǵy qalalyq juqpaly aýrýlar klınıkalyq aýrýhanasynyń emdeý isi boıynsha bas dárigeriniń orynbasary Tamara Ýtaganova;
«Úzdik aýyl dárigeri» - Qostanaı oblysy, Federovskaıa ortalyq aýdandyq aýrýhanasynyń hırýrg dárigeri Edýard Fınk;
«Úzdik meıirger» - Aqtóbe qalasy JMKA-nyń ınterventsııalyq kardıologııa bólimshesi angıografııalyq zerthanasynyń meıirgeri Nazken Erýbaeva;
«Úzdik feldsher» - Aqmola oblysy janyndaǵy jedel medıtsınalyq járdem stansasynyń feldsheri Rýslan Mýsenov;
«Úzdik densaýlyq saqtaý salasynyń táýelsiz sarapshysy» - Pavlodar oblystyq kardıologııalyq ortalyǵynyń anestezıologııa jáne jan saqtaý bóliminiń meńgerýshisi Inna Glovatskaıa;
«Densaýlyq saqtaý salasyndaǵy úzdik menedjer» - Qostanaı qalasynyń №4 emhanasynyń bas dárigeri, Margarıta Bısenova;
«Úzdik provızor» - Almaty qalasy medıtsınalyq-áleýmettik túzetý narkologııalyq ortalyǵynyń provızory Baqyt Ábdrahmanova;
«Medıtsınalyq-áleýmettik saraptamanyń úzdik sarapshysy» - DSÁDM Aqmola oblysy boıynsha Eńbek, áleýmettik qorǵaý jáne kóshi-qon komıteti aımaqtyq departamentiniń medıtsınalyq-áleýmettik sarapshysy Kúlzaıra Aımýrzına.
Sonymen birge, «Úlzdik emhana» respýblıkalyq baıqaýynyń jeńimpazdary da marapattaldy. Olar: Astana qalasynyń №8 emhanasy (bas dáriger Aıgúl Qasymova) jáne Almaty qalasynyń №17 emhanasy (bas dáriger Aıgúl Tájıeva).
Salatanatty jıyn Qazaq SSR Halyq ártisi Eskendir Hasanǵalıev, Qazaqstannyń halyq ártisteri Naǵıma Esqalıeva, Tamara Asar, Qazaqstan Respýblıkasyna eńbegi sińgen qaıratkerler Qydyráli Bolmanov, Tolqyn Zabırova, Baqtııar Omarov, Bátıma Izenaeva jáne ózge de otandyq oryndaýshylardyń qatysýymen ótken merekelik kontsertpen aıaqtaldy.