Qyzmetkerlerdiń 46%-y jumystan shyǵýǵa májbúr bolǵan – depýtattyq saýal
ASTANA. KAZINFORM – Elimizdegi iri uıymdarda bir jyldyń ishinde qol astyndaǵy qyzmetkerlerdiń 30%-nan astamy jumystan shyqqan jaǵdaıda birinshi basshyǵa ákimshilik jaýapkershilik taǵaıyndaý, al 50%-y jumystan shyqqan jaǵdaıda basshyny qyzmetinen bosatý usynyldy. Búgin Májilis depýtaty Nurgúl Taý qyzmetkerlerdiń jappaı jumystan ketý problemasyn kóterdi.
«Qazaqstanda, kadr tapshylyǵy ótkir másele, 2030 jylǵa qaraı mamandarǵa degen qajettilik 1 mln 800 myń adamǵa deıin jetýi múmkin. Qoǵamda dál osyndaı kúrdeli másele barda, jumysshylardyń qyzmetinen jappaı bosatylyp jatqanyn qalaı túsinýge bolady? Bul máseleni jańalyqtar da jarysa aıtýda, mundaı jaǵdaıǵa tap bolǵan jumysshylar áleýmettik jelilerde qorǵan surap, úndeý joldaýda, alaıda quzyrly organdar áreketsiz otyr. Birqatar úndeýdiń negizinde Densaýlyq saqtaý mınıstrliginiń resýrstardy basqarý júıesiniń bazasynan naqty málimetterdi suratyp, mynadaı jaǵdaılardy anyqtadyq. Bir jyldyń kóleminde Almatydaǵy №1 qalalyq klınıkalyq aýrýhanasynda 398 adam, №10 qalalyq emhanasynda 121 adam, №30 qalalyq emhanasynda 90 adam jáne Kókshetaýdaǵy kópsalaly oblystyq balalar aýrýhanasynda 153 adam jumystan ketken», - dedi Nurgúl Taý Májilistiń jalpy otyrysynda Úkimet basshysynyń atyna saýal joldaı otyryp.
Halyq qalaýlysynyń aıtýynsha, jappaı jumystan ketýge jańa basshynyń kelýi men qysymnyń kúsheıýi sebep.
«Sirá, qyzmetkerlerdi jumystan shyǵarýdyń tıimdi tásili – qysym kórsetý bolsa kerek. Aımaqtarǵa jumys saparym barysynda dál osyndaı jaǵdaıǵa baılanysty, bir top azamattarmen kezdestim. Naqty aıtqanda, Almaty qalasy Kardıologııalyq ortalyǵynda zeınet jasyndaǵy jańa basshynyń kelýimen mınıstrliktiń bazasynan alynǵan málimetterge sáıkes 1 jyldyń ishinde 218 maman jumystan shyqqan. Olardyń qatarynda bilikti kardıohırýrgtar, 15-20 jyldan astam qyzmet etken tájirıbeli dárigerler, zeınet jasyna taıaǵan mamandar, tehnıkalyq qyzmetkerler bar. Túrli qysym kórip jumystan shyqqan aq halatty jandar ýákiletti organdarǵa ujymdyq hat joldaǵan, buqaralyq aqparat quraldaryna suhbat ta bergen. Osy istiń mán-jaıyn anyqtaý úshin Eńbek jáne halyqty áleýmettik qorǵaý mınıstrligine tekserýdi usyndym. Mınıstrlik júrgizgen anonımdi saýalnama nátıjesinde qyzmetinen óz erkimen bosatylǵan qyzmetkerlerdiń 46%-y jumystan shyǵýǵa májbúr bolǵandyǵy anyqtalǵan. Úsh azamat statıamen jumystan ketip, sot sheshimi arqyly jumysqa qaıta ornalasty. Ózge de anyqtalǵan quqyqbuzýshylyqtar boıynsha mekemege eskertý berilip, bar joǵy 110 myń teńge ǵana ákimshilik aıyppul salynǵan», - deıdi ol.
Májilis depýtatynyń málimetinshe, atalǵan jaıt densaýlyq saqtaý, bilim berý sekildi memlekettik jáne bıýdjettik salalarda jıi kezdesedi.
Odan ári Nurgúl Taý máseleni sheshý joldaryn usyndy:
- Birinshiden, iri uıymdarda bir jyldyń kóleminde qol astyndaǵy jumysshylardyń 30%-nan astamy jumystan shyqqan jaǵdaıda birinshi basshyǵa ákimshilik jaýapkershilik taǵaıyndaý, sondaı-aq 50%-y jumystan shyqqan jaǵdaıda basshyny laýazymdyq qyzmetinen bosatý usynylady. Jaǵdaı qaıtalanbaýy úshin basshy ózimen birge komandasyn ertip júrýin toqtatýǵa baǵyttalýy kerek;
- Ekinshiden, Eńbek jáne halyqty áleýmettik qorǵaý mınıstrligi jumystan jappaı shyǵý nemese shyǵarý jaǵdaılarynyń esebin júrgizýi, tıimdi tekseris ótkizý ádisterin ázirleýi jáne qoldanysqa engizýi kerek. Sebebi, qazir statıstıka da, nátıjeli tekseris te júrgizilip jatqan joq;
- Úshinshiden, basshyǵa zeınet jasyna taıaǵan qyzmetkermen eńbek shartyn jasasýdan negizsiz bas tartqany nemese toqtatqany úshin jaýapkershilikti kózdeý kerek;
- Tórtinshiden, kásipodaq qyzmetin jetildirý kerek. Ol úshin Eńbek jáne halyqty áleýmettik qorǵaý mınıstrligi kásipodaqtardyń qyzmetine qatysty ashyqtyqty jáne nátıjelilikti arttyratyn tetikterdi engizýi qajet.
Buǵan deıin Májilis depýtaty Maqsat Tolyqbaev sharýalardyń problemasyn kóterip, astyq eksporttaýǵa beriletin sýbsıdııanyń ashyqtyǵyna alańdaýshylyq tanytty.