Óz elime adal eńbek etýden esh jalyqpaımyn – Marııa Mýdrıak
ASTANA. KAZINFORM — Marııa Mýdrıak naýryz aıynda Qazaqstanǵa jaqsy jańalyqtarymen oralmaq. Óner ıesi «Búgin LIVE» baǵdarlamasyna bergen suhbatynda túrli baıqaýlarda el namysyn laıyqty deńgeıde, abyroımen qorǵaýǵa ýáde etti.
Eske sala keteıik, opera ánshisi Prezıdent Jarlyǵymen «Qazaqstannyń eńbek sińirgen qaıratkeri» qurmetti ataǵyna ıe bolǵan edi.
Memlekettik nagradany otandasymyzǵa Rım qalasyna issaparmen kelgen Mádenıet jáne aqparat mınıstri Aıda Balaeva tabystady.
– Mundaı joǵary dárejeli marapatqa ıe bolý – zor qurmet. Bıyl kásibı mansabymnyń bastalǵanyna 28 jyl toldy. Óz elime adal eńbek etýden esh jalyqpaımyn. Óz Otanymdy álemdik sahnada tanystyryp, óner kórsetý – men úshin zor baqyt. El abyroıyn túrli baıqaýlarda laıyqty deńgeıde qorǵaýǵa tyrysamyn, – deıdi Qazaqstannyń eńbek sińirgen qaıratkeri.
Óner ıesi shyǵarmashylyǵyndaǵy jańalyqtarymen de bólisti.
– Bıyl Motsarttyń «Don Jýan» operasyndaǵy keıipker «Donna Anna» men «Grafııany» rólderinde jáne «Barlyq áıelder solaı isteıdi» operasyndaǵy keıipker «Fordılıdjı» rólinde debıýtim boldy. Italııadaǵy Qazaqstan kontsertinen keıin Qytaıǵa sapar shegemin. Qytaıdyń bas opera teatrynda óner kórsetemin, – dedi ánshi.
Opera ánshisi Qazaqstanǵa naýryz aıynda «jaǵymdy jańalyqtarymen» keletinin aıtty.
Aıta keteıik, Djýzeppe Verdı atyndaǵy Mılan konservatorııasynyń túlegi Marııa Mýdrıak búginde álemniń jetekshi opera sahnalarynda óner kórsetip júr. Ol halyqaralyq mamandardyń baǵalaýy boıynsha álemniń úzdik on sopranosynyń qataryna engen.
Marııa Mýdrıak 10 jasynan bastap Italııada vokaldyq ónerdi meńgergen. 2014 jyly Mılandaǵy Djýzeppe Verdı atyndaǵy konservatorııany magıstr dárejesimen támamdaǵan.
Buǵan deıin Aqmola oblysynyń áleýmettik-ekonomıkalyq damýyna eleýli úles qosqan 50-den astam aqmolalyq memlekettik nagradamen marapattalǵanyn jazǵan edik.