Oıshyl aqyn Shákárim Qudaıberdiulynyń týǵanyna — 166 jyl

ASTANA. KAZINFORM — Búgin aqyn, jazýshy, fılosof, tarıhshy, kompozıtor Shákárim Qudaıberdiulynyń týǵanyna 166 jyl toldy. 

Shákárim ózi ómir súrgen ortanyń qoǵamdyq-saıası jáne áleýmettik syr-sıpatyn kóre bilýde, qoǵam men adam tabıǵatyndaǵy kemshilikterdi zerdeleýde, týǵan halqyna jol kórsetýde Abaı baǵytyn ustandy. 

Syrshyl aqynnyń qalamynan tereń oıly, lırıkalyq óleńder, «Qalqaman-Mamyr», «Eńlik-Kebek», «Nartaılaq-Aısulý» sııaqty dastandar, «Ádil-Márııa» romany jáne basqa da prozalyq týyndylar, aýdarmalar, tarıhqa, fılosofııaǵa qatysty eńbekter, sazdy ánder týdy.

Qalamgerdiń «Túrik, qyrǵyz, qazaq Hám handar shejiresi», «Qazaq aınasy», «Qalqaman-Mamyr», «Jolsyz jaza ıakı kez bolǵan is», «Eńlik-Kebek», «Úsh anyq», «Musylmandyq sharty», «Láıli-Májnún» t. b. shyǵarmalary jaryq kórgen.  

Shákárim ánderi qazaq kompozıtorlarynyń shyǵarmalaryna arqaý boldy.

Ahmet Jubanovtyń «Abaı» sıýıtasynyń birinshi bólimine, A. Jubanov pen L. Hamıdıdiń «Abaı» operasyndaǵy Aıdardyń arıozosyna, Aıdar men Ajardyń dýetine sazgerdiń shyǵarmalary paıdalanyldy. 

Uly tulǵanyń «Bul án burynǵy ánnen ózgerek», «Jastyq týraly», «Anadan alǵash týǵanymda» atty ánderi názik, kóńildi qozǵaıtyn syrshyldyǵymen júrekten óz ornyn aldy.