Oıynshylary o bastan myqty qurama men bapker ǵana basymdyqqa ıe – Stanıslav Cherchesov
ASTANA. KAZINFORM – Fýtboldan Qazaqstan ulttyq quramasynyń bas bapkeri Stanıslav Cherchesov agenttik tilshisine bergen suhbatynda aldaǵy jospary men legıonerlerge qatysty pikir bildirdi.
- Stanıslav Salamuly, bıylǵa qandaı josparyńyz bar?
- Jıi qoıylatyn suraq. Biraq, oıyn qashan ótetinin, nege daıyndalý kerektigin bilmeı jatyp jospar qurý múmkin emes. Qazir jerebe tastaldy, endi qashan, qaıdan bastaıtynymyzdy anyq túsinemiz. Jospar osydan shyǵady.
Bizde syrtta eki oıyn ashyq alańda ótedi, demek «Qalaı daıyndalamyz?» degen suraq avtomatty túrde týyndaıdy. Qazaqstanda naýryz aıynda kún salqyn, sondyqtan ashyq alań daıyn bolmaıdy. Qazir osy máseleni qalaı sheshý kerektigin talqylap jatyrmyz. Múmkin bir jerge jınalatyn shyǵarmyz. Jańa ǵana lıganyń jańa prezıdentimen osy másele týraly sóılestik. Jumys júrip jatyr, onyń kóbi kózge túspeıdi, sizder tek 90 mınýttyq oıyndy ǵana kóresizder.
- Qandaı ózgerister bolýy múmkin?
- Árıne, ózgerister bolady. Mysaly, Baýyrjan Islamhan jaǵymsyz jaǵdaıǵa tap boldy. Jaraqat aldy, ota jasaldy, ókinishke qaraı naýryz aıynda bolmaıdy. Osy ýaqyt ishinde belgili deńgeıge kóterilgen oıynshy.
Kim, qandaı kúıde? Qaı klýbqa aýysady? Kim, qalaı oınaıdy? Bapker fýtbolshyny qandaı pozıtsııada qoldanady? Osy sııaqty suraqtarǵa qatysty eshteńe aıta almaımyn.
Men qansha jyldan beri Reseı quramasynda, Qazaqstan quramasynda jumys istep kelem. Bári biz josparlaǵandaı bolǵanyn kórgen emespin, eshqashan olaı bolǵan emes. Óıtkeni, únemi aıaqasty birdeńe bolyp qalady. Biz qaıda baǵyt alyp bara jatqanymyz jaıly kórinis, túsinik bar. Al qalǵanyn jaǵdaı kórsetedi.
- Qazaqstan quramasyndaǵy qyzmetińizdi qalaı baǵalaısyz?
- Eger taza sandardy sóıletsek, onda nashar. Eger ishki jaqtan alyp qarasaq, biraz jaǵymdy sátter bar.
Iá, biz gol soqqan joqpyz jáne az upaı jınadyq. «Mundaı qıyn topta kóp upaı jınaımyz» dep aıtý taıaz oılaý bolar...
Árıne, biz de oń nátıjeni qalaımyz, biraq, qandaıda bir sebeptermen sátsizdikke ushyradyq. Bizge qazir jınaqtalǵan tájirıbe kómektesedi dep úmittenemiz. Eń bastysy, oıynshylar saqadaı saı ma, olardyń daıyndyǵy qalaı?! Mysaly, Darabaevtyń, Zarýtskııdiń jáne Pokatılovtyń ázirge kelisimsharttary joq.
- Qandaıda bir sebeptermen sátsizdikke ushyradyq deısiz... Degenmen, nashar nátıjeniń basty sebebi nede dep oılaısyz? Jattyǵý jetkiliksiz be? Qarjylandyrý az ba, álde fýtbolshylar álsiz be?
- Bizge Holland, Arnaýtovıch, taǵy sol sııaqtylar jetispeıdi. Belgili, belgisiz sebeptermen o bastan-aq myqty klýbtar, quramalar bar. Biz de qazir solarmen teńesý úshin, baǵdarlamamyzdy oryndaý baǵytynda jumys istep jatyrmyz.
Birinshiden, bul jolǵy ulttar lıgasynda bizde ótpeli matchtar bolǵan joq.
Ekinshiden, bizde kishkentaı qadam jasaýǵa kómektesetin uıymdastyrý jaǵy bolǵan joq. Biz júıeni qaıta quryp, tórt qorǵaýshyǵa kóshtik. Bul oıynshylarǵa unaıdy. Qorǵanysty, tepe-teńdikti saqtaý úshin shabýylǵa taǵy bir oıynshyny qostyq. Buryshtan kóbirek dop bere bastadyq jáne dop kóbirek ustaldy. Mysaly, Slovenııamen oıynda 100-den kóp pas berdik, bizde dop boldy.
Oıynshylary o bastan myqty qurama men bapker ǵana basymdyqqa ıe. Óıtkeni, eki kúnde komandalyq oıynǵa, fızıkalyq jaǵdaılarǵa áser etý múmkin emes. Bastapqydan básekelestik ortada oınaıtyn jeke oıynshylar kúshtirek. Ispanııada, Italııada, Germanııada oınaıtyn oıynshy, ol únemi osy deńgeıde jattyǵady. Biz bul jaǵynan artta qalǵanbyz. Biraq, eń bastysy, qazir bizde ynta bar, múmkindik bar.
- Keıingi kezde Qazaqstanda legıonerler máselesi jıi qozǵalyp júr. «Olardan eshqandaı paıda joq» degen syn aıtylady...
- 2014 jyly men «Dınamony» jattyqtyrdym, ol kezde de osy suraqty qoıdy. Quramada 6 legıoner, 5 Reseı azamaty oınaý kerek boldy. Oıynǵa daıyndalyp jatqanda, ony da sanaý kerek. Másele, quramadan kim shyǵady, kim, kimdi aýystyratynynda emes, eń bastysy quramada qansha legıoner bary, shekteý bolýy kerek. Biraq, men 8 sapaly legıonerdi usyndym. Óıtkeni, shekteý bolsa, eshqandaı klýb negizgi emes oıynshyny almaıdy. Naqty 8, 7, 9 legıoner bolý kerek dep aıtpaımyn, belgili bir shek bolýy kerek. Sonda básekelestik orta bolady. Legıonerler tólqujat úshin oınamaıdy. Barlyq jerde sheteldikter bar, Qazaqstan jeke álemde ómir súrmeıdi ǵoı. Al legıonerler laıyqty ma, ony ár klýb ózi sheshýi kerek.
Buǵan deıin habarlaǵanymyzdaı, Qazaqstan fýtbol federatsııasy Cherchesovtiń otstavkaǵa ketýi jóninde málimdeme jasaǵan bolatyn.
Sondaı-aq ótken jyldyń aıaǵyna qaraı federatsııasynyń jańa prezıdenti taǵaıyndaldy.