Otyrar aýdanynda mýzeı túni ótti

OTYRAR. QazAqparat – Túrkistan oblysy, Otyrar aýdanynda memlekettik arheologııalyq qoryq – mýzeıiniń uıymdastyrýymen mýzeı túni ótti. «Mýzeıler sherýi» atty jalpyrespýblıkalyq aktsııa aıasynda ótken shara «Ǵasyrlar kýási - mýzeıdiń ǵajaıyp álemi» taqyrybynda órbidi, dep habarlaıdy QazAqparat tilshisi.

Sala mamandarynyń sózinshe, atalǵan shara Otyrar mýzeıiniń qundylyqtaryna degen halyqtyń yqylasyn arttyrý men ulttyq sana – sezimin qalyptastyrý, óskeleń urpaqtyń jerine, eline degen súıispenshiligin arttyrý maqsatynda uıymdastyryldy. Sondaı-aq, patrıottyq tárbıe berý baǵytynda ótkizildi.

Atalǵan sharada sóz alǵan Otyrar aýdanynyń ákimi Ábdiǵalı Júnisov pen QR Bilim jáne ǵylym mınıstrligi Memleket tarıhy ınstıtýtynyń dırektory Búrkit Aıaǵan jáne mekeme dırektory Sapar Kózeıbaevtar mýzeıdi kópshilikke keńinen tanytýdyń mańyzdylyǵyna toqtaldy. «Mýzeıler sherýi» aktsııasy arqyly mádenıet uıymdary ulttyq mádenı muranyń qoljetimdiligin qamtamasyz etetitin aıta kele, is-sharaǵa qatysýshylarǵa rızashylyqtaryn bildirdi.

Merekelik is-shara Elbasy N.Á.Nazarbaevtyń «Uly dalanyń jeti qyry» maqalasy aıasynda mýzeı qoryndaǵy at ábzeldermen jabdyqtalǵan «Qazanat – qazaqtyń qasıeti» taqyrybyndaǵy kórmemen jalǵasyp, atqa miný kórinisi uıymdastyryldy. Qysh qumyra ónerin meńgerýdiń qyr-syryn kórsetý barysynda qumyrashy Januzaq Erimbetov sheberlik sabaǵyn ótkizdi. Bul kórinister kórermenderdiń qyzyǵýshylyǵyn týdyrdy.

Sonymen qatar, tuńǵysh Prezıdent N.Á.Nazarbaevtyń «Dombyra - qazaqtyń jany» degen sózi keshtegi kórinisterge arqaý bolyp, mýzeı qoryndaǵy dombyralar toptamasy kelýshilerge tanystyryldy. Aýyl jastary bolsa «Etno-keshende» altybaqan teýip, dombyrada án shyrqady. Sóıtip, merekelik keshti qyzdyra tústi. Aýyl syrtynda ot jaǵyp, kúmbirletip kúı tókken jastardyń «dombyra dýman» keshi jurtshylyqqa erekshe áserge bóledi. Shara sońynda balalarǵa anımatsııalyq fılmder qoıylyp, vıktorınalyq suraqtar boıynsha tanymdyq oıyndar uıymdastyryldy. Sharaǵa belsene qatysqan jáne oıynnan jeńimpaz atanǵandar túrli syılyqtarǵa ıe boldy.

Aınur Aqbaeva