Otshashý atqan kezdegi qaýipsizdik sharalary qandaı
ÓSKEMEN. KAZINFORM – Shyǵys Qazaqstan oblysynyń qutqarýshylary otshashý atqan kezdegi qaýipsizdik sharalaryn túsindirdi.

ShQO TJD memlekettik órt baqylaý basqarmasynyń bastyǵy Nurjan Ómirjanovtyń aıtýynsha, Jańa jyl merekesi kezinde otshashý atpaq bolǵan adamdar qarapaıym qaýipsizdik sharalaryn umytyp jatady. Keıbireýler merzimi ótken pırotehnıkalyq ónimder men petardalardy qoldanady.
- Otshashýlardy tek ónimniń saqtalýyn qamtamasyz ete alatyn, kún sáýlesi men jaýyn-shashyn túspeıtin jerde satyp turǵan dúkender men pavılondardan alý qajet. Pırotehnıkalyq ónimder saýdalanatyn oryndar órt dabyl júıesi men alǵashqy órt sóndirý quraldarymen jabdyqtalýy tıis, - dedi ol.
Otshashýdy atý úshin durys oryn tańdaý mańyzdy. Bul keń ári ashyq alań bolýy kerek. 50 metrdeı radıýsta ǵımarattar, kólikter jáne basqa da órtený qaýpi bar obektiler bolmaýy tıis.
Adamdar otshashýdan keminde 35-50 metr qashyqtyqta turýy qajet. Otshashýdy ǵımarat ishinde jáne úı-jaıda qoldanýǵa tyıym salynady. Qatty jelde de otshashýdy atýǵa tyıym salynady. Atylǵan kezde otshashýdyń ústinen eńkeıip qaraýǵa bolmaıdy. Balalarǵa pırotehnıkany qoldanýǵa qatań tyıym salynǵan.
Eske salsaq, osyǵan deıin Semeıde Jańa jyl shyrshasy men túrli is-sharalar uıymdastyrýǵa 30 mln teńge jumsalatyndyǵy habarlanǵan.